Pagpit-os sa Kapareho ug ang Imong Pribilehiyo sa Pagsangyaw
1 Ang pagpit-os sa kapareho maoy kusganong impluwensiya—sa ikaayo o ikadaot. Ang kaubang mga alagad ni Jehova makahatag ug positibong impluwensiya nga magdasig kanato alang sa maayong Kristohanong mga buhat. (Heb. 10:24) Ugaling, ang di-Saksing mga membro sa pamilya, mga isigkatrabahante, mga eskolmet, mga silingan, o ubang mga kaila mahimong magpit-os kanato sa pagsunod sa dalan nga supak sa Kristohanong mga prinsipyo. Sila tingali mosulting “mayam-iron sa maayo [natong] panggawi may kalabotan kang Kristo.” (1 Ped. 3:16) Sa unsang paagi atong mamentinar ang atong determinasyon sa pagpadayon sa pagsangyaw bisan pa sa negatibong pagpit-os sa kapareho nga tingali atong maatubang?
2 Mga Membro sa Pamilya: Usahay, ang usa ka bana o amahan nga dili usa sa mga Saksi ni Jehova tingali dili buot nga ang iyang asawa ug mga anak makig-ambit sa publikong ministeryo. Mao kini ang kahimtang sa usa ka panimalay sa Mexico. Ang asawa ug pito ka anak sa usa ka lalaki nakadangat sa kamatuoran. Sa sinugdan siya supak tungod kay dili niya buot nga ang iyang pamilya magsangyaw ug magtanyag ug literatura sa Bibliya sa pamalaybalay. Iyang gibati nga kini makapakunhod sa ilang dignidad. Bisan pa niana, ang iyang asawa ug mga anak mibarog nga malig-on sa ilang desisyon nga moalagad kang Jehova ug makig-ambit nga regular sa ministeryo. Ngadtongadto, ang lalaki misugod sa pagkasabot sa kahinungdanon sa pagdawat sa kahikayan sa Diyos sa buluhatong pagsangyaw, ug siya usab nagpahinungod sa iyang kaugalingon ngadto kang Jehova. Migugol siyag 15 ka tuig sa pagdawat sa kamatuoran, apan iya kahang nadawat kadto kon ang iyang pamilya wala pa molahutay diha sa ilang pribilehiyo sa pagsangyaw?—Luc. 1:74; 1 Cor. 7:16.
3 Mga Isigkatrabahante: Ang imong mga paningkamot sa pagpamatuod ngadto sa mga isigkatrabahante tingali dili dawaton nga mahinangpon sa pipila. Usa ka sister nag-asoy nga sa dihang ang usa ka panaghisgot bahin sa kataposan sa kalibotan nahitabo diha sa opisina, siya gibiaybiay tungod kay siya nagsugyot nga ilang basahon ang Mateo kapitulo 24. Apan, pipila ka adlaw sa ulahi, usa sa iyang mga isigkatrabahante miingon kaniya nga iyang nabasa ang maong kapitulo ug nakadayeg. Usa ka publikasyon ang napahimutang, ug gihimo ang mga kahikayan alang sa usa ka pagtuon sa Bibliya uban kaniya ug sa iyang bana. Ang unang pagtuon milungtad hangtod sa alas dos sa buntag. Human sa ikatulong pagtuon, sila misugod sa pagtambong sa mga tigom, ug wala madugay human niana sila mihunong sa pagpanabako ug misugod sa pagpakig-ambit diha sa ministeryo. Mahitabo kaha kini kon ang atong sister wala pa maningkamot sa pagpaambit sa iyang paglaom ngadto sa uban?
4 Mga Eskolmet: Dili talagsaon alang sa Saksing mga batan-on nga makasinatig pagpit-os sa kapareho diha sa eskuylahan ug mahadlok nga ang ubang mga batan-on motamay kanila tungod sa pagpakig-ambit sa buluhatong pagsangyaw. Usa ka Kristohanong tin-edyer sa Tinipong Bansa miingon: “Nahadlok ako nga mosangyaw ngadto sa ubang mga batan-on tungod kay ako nahadlok nga himoong kataw-anan.” Busa iyang gilikayan ang mga kahigayonan sa pagsangyaw ngadto sa iyang mga kapareho sa eskuylahan ug diha sa ilang teritoryo. Sa unsang paagi imong maugmad ang kalig-on sa pagbarog nga maisogon sa pagpit-os sa kapareho? Salig kang Jehova, nga nagatinguha sa iyang pahiyom sa pag-uyon. (Prov. 29:25) Ipasundayag ang imong katakos sa paggamit sa Pulong sa Diyos diha sa imong ministeryo. (2 Tim. 2:15) Ang batan-on nga gikutlo di pa dugay misugod sa pag-ampo kang Jehova, nga naghangyo kaniya nga tabangan siya sa pag-ugmad sa tinguha sa pagpakigsulti sa iyang mga eskolmet. Siya misugod sa pagsangyaw sa impormal nga paagi sa eskuylahan, nakabaton ug maayong mga resulta, ug wala madugay nagpakigsulti na sa tanan niyang kaila. Siya nagkanayon: “Kana nga mga batan-on nagkinahanglan ug gustog paglaom alang sa umaabot, ug si Jehova nagagamit kanato sa pagtabang kanila.”
5 Mga Silingan: Tingali aduna kitay mga silingan o ubang mga kaila nga nagpakitag kalagot kanato tungod sa atong pagkamao ug sa atong mga pagtulon-an. Kon mahadlok ka kon unsay ilang hunahunaon, suknaa ang imong kaugalingon: ‘Sila ba nahibalo sa kamatuoran nga motultol sa kinabuhing walay kataposan? Unsay akong mahimo aron maabot ang ilang mga kasingkasing?’ Usa ka magtatan-aw sa sirkito nakamatikod nga maayong mga resulta ang makab-ot sa dihang magsangyaw ngadto sa mga silingan sa minugbo ug sa regular nga paagi. Pangamuyo kang Jehova alang sa gikinahanglang kalig-on ug kaalam sa pagpadayon sa pagpangita sa matinud-anog-kasingkasing nga mga tawo.—Filip. 4:13.
6 Ang atong pagnunot sa negatibong pagpit-os sa kapareho mahimong makapahimuot sa mga magsusupak, apan ang pagbuhat ba niana maoy alang sa ila gayong ikaayo—o sa atoa? Si Jesus gisupak sa mga tawo diha sa iya mismong komunidad. Giantos pa gani niya ang hait nga mga komento sa iyang igsoong mga lalaki sa inahan. Apan nasayod siya nga siya makatabang lamang kanila pinaagi sa padayong pagsubay sa dalan nga gipahiluna sa Diyos alang kaniya. Busa, si Jesus “nakaagwanta nianang sukwahing sulti sa mga makasasala batok sa ilang kaugalingong mga kaayohan.” (Heb. 12:2, 3) Ingon niana ang kinahanglan natong buhaton. Magmadeterminado sa pagpahimulos sa imong pribilehiyo sa pagsangyaw sa mensahe sa Gingharian. Pinaagig pagbuhat niana, “imong maluwas ang imong kaugalingon ug kadtong kinsa mamati kanimo.”—1 Tim. 4:16.