Ang Kamatuoran Bahin sa Gingharian sa Diyos
Gitudloan ni Jesus ang iyang mga sumusunod sa pag-ampo: “Amahan namo nga anaa sa mga langit, balaanon unta ang imong ngalan. Paanhia ang imong Gingharian. Matuman unta ang imong kabubut-on, maingon sa langit, mao man usab sa yuta.” (Mateo 6:9, 10) Unsa ang Gingharian sa Diyos? Unsay himoon niini? Ug nganong angay nato ning iampo?
Si Jesus ang Hari sa Gingharian sa Diyos.
Lucas 1:31-33: “Nganli siyag Jesus. Siya mahimong bantogan ug tawgong Anak sa Labing Hataas, ug ihatag ni Jehova nga Diyos kaniya ang trono ni David nga iyang amahan. Siya magahari sa panimalay ni Jacob hangtod sa hangtod, ug dili matapos ang iyang Gingharian.”
Ang Gingharian mao ang pangunang tema sa pagsangyaw ni Jesus.
Mateo 9:35: “Si Jesus milibot sa tanang siyudad ug kabaryohan, nga nagtudlo diha sa mga sinagoga ug nagwali sa maayong balita sa Gingharian ug nag-ayo sa tanang matang sa sakit ug depekto sa lawas.”
Gihatagan ni Jesus ang iyang mga tinun-an ug ilhanan aron mahibalo sila kon kanus-a moabot ang Gingharian.
Mateo 24:7: “Kay ang nasod makiggubat batok sa nasod ug ang gingharian batok sa gingharian, ug duna unyay mga kanihit sa pagkaon ug mga linog sa lainlaing dapit.”
Ang mga tinun-an ni Jesus nagsangyaw karon sa tibuok kalibotan bahin sa Gingharian.
Mateo 24:14: “Ug kining maayong balita sa Gingharian isangyaw sa tibuok yuta sa pagpamatuod ngadto sa tanang kanasoran, ug unya moabot ang kataposan.”