Mga Ginikanan—Isilsil ang Mapuslanong mga Batasan Diha sa Inyong mga Anak
1 Ang mapuslanong mga batasan dili mabatonan nga kinaiyanhon, ni kini mabatonan nga sulagma. Dugang pa, ang pagsilsil sa maayong mga batasan diha sa mga anak nagkinahanglag panahon. Ang “isilsil” nagkahulogang “ipatisok nga anam-anam” o “ipatuhop.” Ang pagkamapinadayonon gikinahanglan sa mga ginikanan aron ‘padayong matutoon [ang ilang mga anak] diha sa disiplina ug mapasiboong pagdumala-sa-kaisipan ni Jehova.’—Efe. 6:4.
2 Sugdi Sukad pa sa Pagkamasuso: Ang katakos sa mga bata pa kaayo sa pagkat-on ug sa pagbuhat sa bag-ong mga butang maoy talagsaon. Bisan kon malisdan ang mga hingkod nga makakat-on sa usa ka bag-ong pinulongan, ang wala pa magtungha nga mga bata makakat-on ug duha o tulo ka pinulongan nga dungan. Ayaw gayod batia nga ang imong anak bata pa kaayo aron makaugmad ug maayong mga batasan. Kon ang instruksiyon sa kamatuoran sa Bibliya magsugod nga sayo ug ipadayon, sa panahon nga ang bata modakodako na, ang iyang hunahuna mapuno sa kahibalo nga maghimo kaniya nga “maalamon alang sa kaluwasan.”—2 Tim. 3:15.
3 Himoang Batasan ang Pag-alagad sa Kanataran: Ang mapuslanong batasan nga kinahanglang isilsil sulod sa mga tuig sa pagtubo sa bata mao ang makanunayong pagsangyaw sa maayong balita sa Gingharian sa Diyos. Gisugdan kini sa daghang ginikanan pinaagi sa pagdala sa ilang mga anak diha sa pamalaybalay nga ministeryo samtang ang mga anak masuso pa. Ang regular nga pagpakig-ambit sa mga ginikanan sa pagsangyaw nga buluhaton motabang sa ilang mga anak sa pag-ugmad sa apresasyon ug kasibot alang sa ministeryo. Ikapakita sa mga ginikanan sa mga anak kon unsaon sa pagpakig-ambit sa pagsangyaw diha sa matag bahin sa pag-alagad sa kanataran.
4 Ang pagpatala sa Tunghaan sa Teokratikanhong Ministeryo makatabang usab sa mga bata. Magtudlo kini kanila ug maayong mga batasan sa pagtuon ug kon unsaon pagbasa uban ang pagsabot. Ilang makat-onan ang pagpakighisgot bahin sa Bibliya, paghimog mga pagbalikduaw, ug pagdumalag mga pagtuon sa Bibliya. Ang maong pagbansay mahimong magpadasig kanila sa pagpayunir ug pagpangab-ot sa linaing mga pribilehiyo sa pag-alagad. Daghang Bethelite ug mga misyonaryo mahinangpong naghinumdom sa ilang unang mga adlaw sa Tunghaan sa Ministeryo ug giisip kana ingong usa ka tagana nga mitabang kanila sa pag-ugmad sa mapuslanong mga batasan.
5 Kitang tanan maoy sama sa yutang kulonon diha sa mga kamot sa Dakong Magkukulon, si Jehova. (Isa. 64:8) Kon mas bag-o ang yutang kulonon, mas sayon kining umolon. Kon mas dugay kining paughon, mahimong mas gahi kini. Sama usab niana ang mga tawo. Sa bata pa sila, mas dali silang umolon—ug kon mas bata, mas maayo ang mga resulta. Ang ilang linghod nga katuigan maoy katuigan sa pagtubo, sa dihang ang pagporma mahitabo alang sa ikaayo o ikadaot. Ingong matinagdanong ginikanan, sugdi nga sayo pa ang pagsilsil sa mapuslanong mga batasan sa imong mga anak diha sa Kristohanong ministeryo.