Si Jehova Nagahatag ug Gahom

¹ Unsay imong impresyon sa apostol nga si Pablo? Samtang atong basahon ang basahon sa Mga Buhat, atong mapabilhan kon unsa ka makugihon siya diha sa pag-alagad kang Jehova. Sa unsang paagi nagmalamposon si Pablo sa tanan niyang gibuhat? Siya miingon: “Sa tanang butang ako adunay kusog pinaagi kaniya nga nagahatag ug gahom kanako.” (Filip. 4:13) Kita usab makakuhag kaayohan gikan sa gahom nga gihatag ni Jehova. Sa unsang paagi? Pinaagi sa pagpahimulos sa unom ka tagana nga iyang gihimo alang kanato aron kita mabaskog pag-usab ug mapalig-on sa espirituwal.

² Pulong sa Diyos: Maingon nga kita kinahanglang mokaon aron mamentinar ang atong pisikal nga kalig-on, kinahanglang atong amomahon ang atong kaugalingon pinaagi sa Pulong sa Diyos aron magpabiling buhi sa espirituwal. (Mat. 4:4) Ang Bibliya nagtaganag gahom sa pagpalig-on kanato. Aron mamentinar ang atong kasibot ug kadasig dapig sa kamatuoran, kinahanglan kitang mohimog makahuloganong personal nga pagtuon ug pagpamalandong, matag adlaw kon posible.​—Sal. 1:​2, 3.

³ Pag-ampo: Hinungdanon nga masuod kang Jehova, ilabina sulod sa mga panahon sa linaing panginahanglan. Pinaagi sa iyang espiritu, siya maghatag ug makapalagsik nga gahom kanilang nangamuyo kaniya niana diha sa pag-ampo. (Luc. 11:​13; Efe. 3:16) Ang Kasulatan nagdasig kanato sa ‘paglahutay sa pag-ampo.’ (Roma 12:12) Nagabuhat ka ba niana?

⁴ Ang Kongregasyon: Kita usab makakuhag kalig-on ug pagdasig gikan sa mga tigom sa kongregasyon ug gikan sa mainitong panag-ubanay nga atong mapahimuslan didto uban sa atong mga igsoong lalaki ug babaye. (Heb. 10:​24, 25) Sa dihang kita magkaproblema, sila motabang kanato sa pagdasig ug mahigugmaong moabag kanato.​—Prov. 17:​17; Eccl. 4:10.

⁵ Ang Ministeryo sa Kanataran: Ang regular nga pagpakig-ambit diha sa ministeryo motabang kanato nga padayong nakasentro ang pagtagad diha sa Gingharian ug sa mga panalangin niini. Ang atong espiritu madasig sa dihang atong tabangan ang uban sa pagkat-on bahin kang Jehova. (Buh. 20:35) Dili tanan kanato ang makahimo sa pagbalhin aron mag-alagad diin mas dako ang panginahanglan o makig-ambit sa bug-os-panahong pag-alagad, apan kita makabaton sa ubang mga paagi ug usa ka makahuloganong pakig-ambit diha sa ministeryo.​—Heb. 6:​10-12.

⁶ Kristohanong mga Magtatan-aw: Kita makakuhag kaayohan gikan sa pagdasig ug sa tabang nga itagana sa mga ansiyano. Si Jehova nagtudlo kanila aron magbantay sa panon sa Diyos nga ubos sa ilang pag-atiman. (1 Ped. 5:2) Ang nagapanawng mga magtatan-aw nagpalig-on sa mga kongregasyon nga ilang gialagaran, sama sa gibuhat ni Pablo sa iyang adlaw.​—Roma 1:​11, 12.

⁷ Mga Panig-ingnan sa Matinumanong mga Tawo: Makapalagsik ang pagkonsiderar sa makapadasig nga mga panig-ingnan sa matinumanong mga isigkamagbubuhat, sa karaan man ug modernong adlaw. (Heb. 12:1) Kon gikinahanglan nimong mapabaskog, nganong dili basahon ang usa sa makapadasig nga mga kaagi sa kinabuhi diha sa atong mga magasin, usa ka makapalig-ong taho sa Yearbook, o pipila sa makapahinam nga mga asoy sa modernong-adlaw nga kasaysayan sa mga Saksi ni Jehova diha sa librong Mga Magmamantala?

⁸ Usa ka igsoong lalaki, nga karon mga 95 anyos ang edad, midawat sa kamatuoran samtang bayong pa. Samtang siya usa pa ka batan-on, ang iyang pagtuo nabutang sa pagsulay. Una sa tanan, ang pipila nga aktibong nakig-uban sa kongregasyon mibiya sa organisasyon ni Jehova. Dayon dihay pamalaybalay nga buluhaton, nga iyang nakaplagang malisod. Bisan pa niana, siya kanunayng misalig kang Jehova. Sa wala madugay siya mipahimulos sa ministeryo. Ug karon? Bisan pa sa nagakaluyang panglawas, siya sa gihapon membro sa pamilyang Bethel sa Brooklyn, nga nag-alagad sa Nagamandong Lawas. Wala siya magbasol bahin sa pagtapot sa organisasyon ni Jehova.

⁹ Usa ka sister nga membro sa pamilyang Bethel sa Britanya nabawtismohan sa dihang siya 13 anyos. Misugod siya sa pagpayunir uban sa iyang magulang nga igsoong lalaki pagkasunod tuig, ug usa ka tuig human niana, ang iyang amahan nabilanggo tungod sa iyang neyutralidad panahon sa Gubat sa Kalibotan II. Padayon siyang misalig kang Jehova alang sa gahom, ug siya mipadayon sa pag-alagad sa matuod nga Diyos. Sa ngadtongadto, naminyo siya sa usa ka matinumanong igsoong lalaki, ug duyog silang nagpadayon sa pagbuhat sa kabubut-on ni Jehova. Human sa 35 ka tuig sa kaminyoon, ang iyang bana kalit nga namatay. Sa makausa pa siya mikuhag kalig-on gikan kang Jehova, ug siya padayong nag-alagad hangtod niining adlawa, nga naglantaw sa unahan sa pag-alagad sa walay kataposan ingong usa ka membro sa yutan-ong pamilya ni Jehova.

¹⁰ Si Jehova nagabulig ug nagapabaskog sa iyang matinumanong mga alagad. “Siya naghatag ug gahom sa gikapoy; ug sa walay dinamikong kusog siya nagpadagaya sa bug-os nga gahom.” Kita makabaton niining walay limite nga tinubdan sa gahom pinaagig pagpahimulos sa tanang unom ka tagana nga gihisgotan sa ibabaw. Hinumdomi: “Kadtong naglaom kang Jehova maulian sa kusog. . . . Sila managan ug dili maluya; sila manglakaw ug dili kapoyon.” (Isa. 40:​29-31) Si Pablo misalig gayod pag-ayo kang Jehova alang sa kalig-on, ug kinahanglang manig-ingon kita niana.