Magmaigmat sa Pagkaplag sa mga Tawong Bungol sa Inyong Teritoryo
1 Si Jehova nagdapit: “‘Umari ka!’ . . . Si bisan kinsa nga may tinguha paimna sa tubig sa kinabuhi nga walay bayad.” (Pin. 22:17) Ang nagkadaghang tawong bungol maoy apil niadtong misanong niini nga pagdapit. Ingong resulta, sulod sa miaging 7 ka tuig, usa ka senyas-pinulongan nga kongregasyon ug duolan sa 15 ka senyas-pinulongan nga mga grupo ang naporma sa Pilipinas.
2 Bisan kon ang senyas-pinulongan nga mga kongregasyon ug mga grupo bug-os nga nagsentro sa ilang mga paningkamot sa pagkontak sa mga tawong bungol ug may kakulian sa pangdungog diha sa ilang isigkateritoryo, daghan pa nianang mga tawhana ang kaplagon pa gayod ug sangyawan niining nasora.
3 Sa Unsang Paagi Makatabang Ka? Samtang anaa sa publikong mga dapit, nakamatikod ka ba sa mga tawong naggamit ug senyas nga pinulongan? May nahibaloan ka ba diha sa imong trabahoan o diha sa imong eskuylahan nga may bungol nga membro sa pamilya? Magmaigmat sa pagkaplag niadtong mga bungol samtang nagapadayon ka sa imong adlaw-adlawng mga kalihokan. Apan sa unsang paagi makaseguro ka nga sila masangyawan sa Gingharian?
4 Pagsangyaw: Kon may nahibaloan kang senyas-pinulongan nga kongregasyon o grupo nga duol nimo, angayng pahibaloon nimo sila sa adres sa maong tawong bungol. Daghang bungol nga mas kusog ang pag-uswag sa pagkat-on sa kamatuoran sa dihang sila makapakig-uban sa bungol nga mga Saksi diha sa mga tigom sa kongregasyon nga gidumala sa Philippine Sign Language. Busa, kon may senyas-pinulongan nga kongregasyon o grupo sa inyong dapit, ang inyong sekretaryo sa kongregasyon angayng magpadala sa impormasyon ngadto niana bahin sa tanang tawong bungol sa inyong teritoryo.
5 Komosta na man kon walay usa nga duol aron mohatag ug espirituwal nga tabang sa mga tawong bungol sa inyong komunidad? Sa unsang paagi makatabang ka? Nganong dili mohimog balikduaw ug makigsulti ni bisan kinsang mga membro sa panimalay nga makadungog? Tanyagi nga ipasalida ang usa ka senyas-pinulongan nga video aron pukawon ang interes sa tawong bungol. Ubay-ubayng mga magmamantala sa Pilipinas ang naningkamot sa pagkat-on ug senyas nga pinulongan aron masangyawan ang mga bungol nga mas epektibo. (Buh. 16:9, 10) Ang brosyur nga Gikinahanglan ug ang librong Kahibalo mabatonan sa senyas nga pinulongan diha sa video. Ang pagdumalag mga pagtuon sa Bibliya ginamit kini nga mga himan nakapamunga na ug daghang positibong mga resulta.
6 Pinaagi sa pagkaigmat sa pagkaplag sa mga tawong bungol sa inyong dapit, ikaw makahatag kanilag kahigayonan sa pag-inom sa tubig sa kinabuhi nga walay bayad.—Mat. 10:11.