Makaalagad Ka ba sa Dapit nga Mas Dako ang Panginahanglan?
1 Gipamalandong mo na ba sukad ang pagbalhin ngadto sa dapit nga adunay panginahanglan sa dugang mga magmamantala sa Gingharian? Kon dapiton nga ‘dali ngari . . . ug tabang,’ ikaw ba mosanong sama sa gibuhat ni apostol Pablo? (Buh. 16:9, 10) Diha sa daghang kongregasyon, adunay panginahanglan sa hamtong sa espirituwal nga mga pamilya, o sa mga payunir sa pagtabang sa pagkobre sa teritoryo, o takos nga mga ansiyano ug ministeryal nga mga alagad sa pagtabang sa pagpanguna. Mahinangop ka bang mosanong niini nga panginahanglan? Sa unsang paagi posible ang pagpalampos niini?
2 Pagtuo ug Pagsalig Gikinahanglan: Sa pagtultol sa Diyos, mibiya si Abram sa iyang lungsod nga natawhan sa Ur ug mibiyahe ug 1,000 kilometros ngadto sa Haran kauban sa iyang asawa, pag-umangkon nga lalaki, ug tigulang na nga amahan, si Tera. (Gen. 11:31, 32; Neh. 9:7) Human mamatay si Tera, gisugo ni Jehova si Abram, nga nianang panahona 75 anyos na ang edad, sa pagbiya sa Haran ug sa iyang mga paryente ug sa pagbiyahe paingon sa usa ka yuta nga ipakita sa Diyos kaniya. Si Abram, Sarai, ug Lot “milakaw.” (Gen. 12:1, 4, 5) Siyempre, si Abram wala mobalhin aron sa pag-alagad sa dapit nga mas dako ang panginahanglan alang sa mga ministro. Apan ang iyang pagbalhin nagkinahanglag usa ka butang. Unsay gikinahanglan?
3 Nagkinahanglan kini ug pagtuo ug pagsalig alang kang Abram sa pagpanlimbasog sa maong panaw. Ang iyang panghunahuna ug paagi sa kinabuhi kinahanglang usbon. Kinahanglan niyang biyaan ang kasegurohan uban sa iyang mga paryente. Apan misalig siya kang Jehova sa pag-atiman kaniya ug sa iyang panimalay. Daghan karong adlawa ang nagpasundayag sa ilang pagsalig kang Jehova sa susamang paagi.
4 Pagbalhin Ngadto sa mga Kongregasyon nga Nagkinahanglag Tabang: Daghan pang kongregasyon sa Pilipinas ang kulang ug takos nga mga ansiyano o ministeryal nga mga alagad. Kon ikaw anaa sa kongregasyon nga adunay daghang hamtong nga mga igsoong lalaki ug buot nga motabang sa laing kongregasyon diha sa inyong sirkito, nan mas maayo nga moduol sa inyong magtatan-aw sa sirkito. Nahibalo siya sa tibuok sirkito ug sa mga panginahanglan niini ug siya makahatag kanimog impormasyon kon asa ka makatabang. Ang nagapanaw nga mga magtatan-aw sagad moduol sa mga igsoon kon aduna silay nahibaloang panginahanglan ug kon ikaw duolon, makaboluntaryo ka ba sa pagtabang?
5 Di-Dugay nga mga Asaynment: Nakapahimulos ka na ba sukad sa dagayang mga panalangin tungod sa pagkobre sa wala-matudlo nga teritoryo, bisan kon sa di-dugay gayod nga panahon? Di pa dugay, duha sa atong mga magtatan-aw sa sirkito mihimog unang tikang sa paggamit sa ilang semana sa pagpayunir sa paghikay ug mga grupo sa mahinangpong mga igsoon sa pagsangyaw sa hilit nga mga teritoryo sa ilang mga sirkito nga wala makobrehi sulod na sa daghang tuig. Angayan ba ang maong panlimbasog?
6 Usa niini nga mga magtatan-aw sa sirkito nagkuyog ug 35 ka igsoon sa pagduaw sa hilit nga mga balangay sa usa ka bukid. Nagdala sila ug ilang kaugalingong pagkaon ug miestar sa dapit nga madayonan sulod sa usa-ka-semana nga biyahe. Ang resulta? Ilang naduaw ang mga tawo nga wala makahibalag ug mga Saksi sa halos 30 ka tuig. Nakapahimutang sila ug katibuk-ang 60 ka libro, 186 ka magasin, 50 ka brosyur, ug 287 ka tract. Nasugdan usab nila ang 74 ka pagtuon sa Bibliya. Unsay gibati sa mga igsoon? Ang magtatan-aw sa sirkito miingon: “Kining talagsa rang kalihokan sa pagsangyaw sa pagkatinuod dili lamang nagpalig-on sa among mga bugkos sa inigsoong gugma kondili usab sa among pagtuo kang Jehova.” Tulo sa grupo nalipay pag-ayo niana busa napalihok sila sa pag-aplay sa regular nga pagpayunir.
7 Ang pagdawat sa temporaryong asaynment sa pag-alagad sa dapit nga mas dako ang panginahanglan makaalagad sa laing katuyoan. Kadtong nagbuhat sa ingon makabaton ug mapuslanong impormasyon sa pagtabang kanila sa ‘pagkuwenta sa gasto’ sa pagbalhin ngadto sa laing bahin sa nasod.—Luc. 14:28.
8 Pagbalhin sa Dapit nga Mas Dako ang Panginahanglan: Determinado si Jehova nga ang maayong balita mamantala “ngadto sa tanang kanasoran” sa dili pa modangat ang kataposan. (Mat. 24:14) Kay nasayod niini, ikaw ba mahinangop sa pagbalhin bisan sa gawas sa inyong sirkito ngadto sa dapit nga mas dako ang panginahanglan?
9 Ikaw ba nagretiro na? Aduna ka ba ing tinong kita? Kon wala, makahikay ka ba ug kinaugalingong-trabaho? Kon ikaw dili makabalhin sa laing dapit, makatabang ka ba ug usa ka membro sa pamilya aron makaalagad sa laing lugar?
10 Kon human sa mainampoong pagkonsiderar imong gibati nga makaarang ka sa pagsagubang sa hagit sa pagbalhin ngadto sa dapit nga mas dako ang panginahanglan, ipakighisgot ang maong butang sa imong pamilya ug sa mga ansiyano diha sa imong kongregasyon. Maayo usab nga ipakighisgot kana sa imong magtatan-aw sa sirkito, sanglit nahibalo siya sa mga dapit sa duol nga nagkinahanglag tabang. Kon buot nimong moadto sa mas lagyong mga dapit, mahimo kang mosulat ngadto sa Service Department sa sangang buhatan. Ihatag ang imong sulat ngadto sa mga ansiyano aron ilang ikalakip ang ilang mga komento ug rekomendasyon sa dili pa kini ipadala sa Sosyedad.
11 Unsay angay nimong ilakip sa imong sulat? Ang imong edad, petsa sa bawtismo, mga responsabilidad sa kongregasyon, kahimtang sa kaminyoon, ug kon ikaw aduna bay menor de edad nga mga anak. Hinungdanon ang pagsulti nga ikaw makasuportar sa imong kaugalingon sa pinansiyal nga paagi. Nganli ang mga probinsiya nga imong gipalabi nga alagaran, sumala sa imong personal nga mga panginahanglan.
12 Ang imo bang mga kahimtang magtugot kanimo sa pag-alagad sa dapit nga mas dako ang panginahanglan? Kon mao, nan matikdi kon sa unsang paagi si Jehova padayong nagabubo ug dagayang mga panalangin diha kanilang nagasalig kaniya samtang ilang gipasundayag ang espiritu sa pagsakripisyo-sa-kaugalingon!—Sal. 34:8; Mal. 3:10.