Gamitang mga Panahon sa Lulinghayaw sa Hustong Paagi
1 Niining malisod nga mga adlaw, kitang tanan nanginahanglan sa pag-usab sa paso sa popanahon. Ang tinong gidaghanon sa lulinghayaw maoy husto. Apan, ang hilabihan ka daghang panahong gugolon sa lulinghayaw, kalingawan, ug pakighugoyhugoy makadaldal sa usa ka tawo ngadto sa paggugol ug menos kaayong panahon diha sa espirituwal nga mga pangagpas. Kinahanglan natong gamiton ang mga panahon sa lulinghayaw sa hustong paagi. (Mat. 5:3) Sa unsang paagi kini posible? Pinaagi sa pagsunod sa tambag nga makaplagan sa Efeso 5:15-17.
2 Limitahe: Si Pablo misulat nga ang mga Kristohanon angay nga ‘magbantay pag-ayo’ kon sa unsang paagi maalamon nilang gamiton ang ilang mga kinabuhi. Ang pagkamakasaranganon ug pagpugong-sa-kaugalingon gikinahanglan sa paglimite sa panahon sa lulinghayaw kon unsa gayod ang gikinahanglan. Makaayong hatagan ug seryosong pagtagad ang paagi sa atong paggamit sa atong libreng panahon. Ang lulinghayaw angayng magsilbi ug pipila ka mapuslanong katuyoan inay kay magpabati kanato nga atong giusikan ang panahon o magpalapoy kanato. Kon mobati kitag kahaw-ang, pagkadi-tagbaw, ug pagkasad-an human sa paghimo sa usa ka kalihokan, kini magpaila nga kinahanglang himoon ang mga kausaban sa atong paggamit sa panahon.
3 Magmakataronganon: Si Pablo naghatag ug tambag sa ‘pagpalit sa nahiangay nga panahon’ alang sa mas hinungdanong mga butang sa kinabuhi, nga dili mahimong “dili-makataronganon.” Ang dedikadong mga Kristohanon dili makatugot sa ilang mga kinabuhi nga magsentro diha sa lulinghayaw. Bisan kon ang pahulay ug pagpahayahay makapalagsik kanato sa pisikal, ang tuboran sa espirituwal nga kusog mao ang aktibong puwersa sa Diyos. (Isa. 40:29-31) Atong madawat ang iyang espiritu maylabot sa teokratikanhong mga kalihokan—pagtuon sa Bibliya, pagtambong sa mga tigom sa kongregasyon, pagpakig-ambit diha sa pag-alagad sa kanataran—dili pinaagi sa lulinghayaw.
4 Ipahiluna ang mga Unahonon: Gitambagan ni Pablo ang mga Kristohanon nga ‘padayong sabton kon unsa ang kabubut-on ni Jehova.’ Nagtudlo si Jesus nga ang atong mga kalihokan angayng magsentro diha sa Gingharian sa Diyos ingong atong unahonon sa kinabuhi. (Mat. 6:33) Maoy kinahanglanon nga atong unang himoon ang mga butang nga magtugot kanato sa pagtuman sa atong dedikasyon kang Jehova. Human niana, ang panahon sa lulinghayaw mahimong gamiton sa hustong paagi. Kon buhaton kana, aduna kana ing maayong epekto, ug mas malingaw kita niana.—Eccl. 5:12.