Magmatagbaw sa Imong Nabatonan
1 Ang Kasulatan nagpahimangno kanato sa pagtagana sa materyal nga mga panginahanglan sa atong panimalay, apan dili kini angayng mao ang atong hatagag pangunang tumong sa kinabuhi. Ang espirituwal nga mga butang mao ang kinahanglang unahon. (Mat. 6:33; 1 Tim. 5:8) Ang pagkaplag ug maayong pagkatimbang maoy usa ka suliran niining “makuyaw nga mga panahong lisod sagubangon.” (2 Tim. 3:1) Unsay makatabang kanato nga magmatimbang?
2 Dawata ang Hunahuna sa Bibliya: Ang Pulong sa Diyos nagpasidaan kanato nga ang pagpangagpas sa mga bahandi makadaot sa espirituwal. (Eccl. 5:10; Mat. 13:22; 1 Tim. 6:9, 10) Niining makuyaw nga panahon, mahimong makadaot kang bisan kinsa kanato nga magmapuliki kaayo sa sekular nga panginabuhi o pinansiyal nga mga kabalaka nga atong ibalhin ang espirituwal nga mga kalihokan—mga tigom, pagtuon, ug pag-alagad—ngadto sa ikaduhang luna sa atong kinabuhi. (Luc. 21:34-36) Sa kasukwahi, ang Bibliya nagtambag: “Kon kita adunay makaon ug ikabesti, kita magmakontento na niining mga butanga.”—1 Tim. 6:7, 8.
3 Wala kini magkahulogan nga ang mga Kristohanon kinahanglang magpuyo sa gipahamtang-sa-kaugalingon nga kakabos. Apan motabang kini kanato sa pag-ila kon unsa gayod ang atong materyal nga mga panginahanglan—pagkaon, besti, ug igong balay nga atong kapuy-an. Kon atong nabatonan na ang mga panginahanglan sa kinabuhi, dili kita angayng mangagpas kanunay sa mas taas nga sukdanan sa pagkinabuhi. Sa dihang maghunahunag usa ka palitonon o modugang ug trabaho, makaayo kanatong pangutan-on ang atong kaugalingon, ‘Kinahanglanon ba gayod kini?’ Ang paghimo niana motabang kanato sa pagtuman sa inspiradong tambag: “Himoa ang inyong paagi sa pagkinabuhi nga mahigawas sa gugma sa salapi, samtang kamo magmakontento sa presenteng mga butang.”—Heb. 13:5.
4 Kon mosalig kita kang Jehova, iya kitang panalanginan. (Prov. 3:5, 6) Bisan tuod angay kitang magkugi aron mabatonan ang adlaw-adlaw nga mga panginahanglan, dili nato isentro ang atong kinabuhi nianang mga butanga. Kabos man kita o adunahan, kita mosalig kang Jehova sa pagtagbaw sa atong mga panginahanglan. (Filip. 4:11-13) Tungod niana, atong matagamtam ang diyosnong katagbawan duyog sa uban pang daghang panalangin.
5 Sundoga ang Pagtuo sa Uban: Ang usa ka nag-inusarang ginikanan nga nagpadako sa iyang anak nga babaye diha sa dalan sa kamatuoran anam-anam nga nagpayano sa iyang kinabuhi. Bisan pag natagamtam niya ang mga kaharuhay sa iyang balay, mibalhin siya sa mas gamayng balay ug sa ulahi ngadto sa usa ka apartment. Kini nagpaarang kaniya sa pagpamenos sa iyang mga oras sa sekular nga trabaho aron iyang ikagahin ang dugang panahon sa ministeryo. Human mohingkod ug maminyo ang iyang anak nga babaye, ang maong inahan miretiro ug sayo, bisan pag nagkahulogan kini nga makunhoran pa gayod ang iyang kita. Ang atong igsoong babaye anaa na karon sa iyang ikapitong tuig ingong regular payunir ug wala magbasol maylabot sa materyal nga mga sakripisyo nga iyang gihimo aron mauna ang intereses sa Gingharian sa iyang kinabuhi.
6 Ang usa ka ansiyano ug iyang asawa nagpayunir sulod sa daghang tuig samtang nagmatuto sa ilang tulo ka anak. Ingong pamilya, ilang nakat-onan nga magmakontento sa pagtagbaw sa ilang mga panginahanglan inay tagbawon ang ilang mga gusto. Ang igsoong lalaki nag-ingon: “Gikinahanglan namong magkinabuhi nga mas yano. Bisan pag naagoman namo ang pipila ka malisod nga mga panahon, si Jehova nagtagana kanunay kon unsay among panginahanglan. . . . Sa dihang makita ko nga giuna sa akong pamilya ang espirituwal nga intereses, gibati ko nga husto ang tanan, ug ako adunay pagbati sa kalamposan.” Ang iyang asawa midugang: “Sa dihang makita ko [ang akong bana] nga puliki sa espirituwal nga mga butang, mobati kog dulot pangsulod nga katagbawan.” Ang mga anak usab nalipay nga ang ilang mga ginikanan nakahukom sa pag-alagad kang Jehova nga bug-os-panahon.
7 Alang niadtong mopili sa maong kurso sa diyosnong pagkamahinalaron inay kay ang pagpangagpas sa materyal nga mga butang, ang Bibliya nagsaad ug dagayang mga panalangin karon ug sa kinabuhing umaabot.—1 Tim. 4:8.