Pangutana

◼ Unsay angay natong hinumdoman sa dihang mogamit ug cellular nga mga telepono ug elektronikong mga pager?

Ang maong mga himan makapaarang kanato sa pagkontak sa uban sa halos tanang dapit nga atong nahimutangan. Bisan tuod mapuslanon tingali kini, kita angayng mag-amping nga dili maggamit sa mga cell phone ug mga pager sa dili haom nga mga panahon nga makabalda sa atong ministeryo o Kristohanong mga tigom. Sa unsang paagi kini mahitabo?

Tagda ang epekto niini kon motingog ang atong cell phone o pager samtang kita nagsangyaw diha sa ministeryo sa kanataran. Unsa kahay hunahunaon sa tagbalay? Unsang impresyon ang atong ikahatag sa tagbalay kon mohunong kita sa pagsulti aron tubagon ang maong tawag? Tinong dili gayod nato buot nga mobuhat ug bisan unsa nga makabalda sa uban sa pagpamati sa mensahe sa Gingharian. (2 Cor. 6:3) Busa, kon magdala kitag cell phone o pager, kinahanglang ato kining adyason aron dili kini makabalda kanato o sa uban samtang kita makig-ambit sa ministeryo sa kanataran.

Komosta man kon nagpaabot lang kita samtang ang uban maoy nagsangyaw? Kon naggahin kitag panahon alang sa pag-alagad sa kanataran, dili ba angay natong isentro ang atong hunahuna sa maong kalihokan? Agig pagtahod sa atong sagradong pag-alagad, palihog asikasoha ang wala-kinahanglanang personal nga kalihokan o sosyal nga mga kasabotan sa laing panahon. (Roma 12:7) Siyempre, wala kini maglakip sa paggamit ug telepono aron sa paghatag ug dugang pamatuod o sa paghimog kasabotan alang sa dugang pagpamatuod.

Kita kinahanglang ilabinang magmabinantayon bahin sa paggamit ug mga cell phone samtang magdrayb, sanglit gipakita sa pipila ka pagtuon nga sa pagbuhat niana dakog purohan nga maaksidente. Kita angayng estriktong mosunod sa bisan unsang balaod nga nagdili sa paggamit ug mga cell phone samtang nagdrayb.

Kita motambong sa Kristohanong mga tigom, asembliya, ug mga kombensiyon aron sa pagsimba kang Jehova ug aron iyang matudloan. Dili ba ang pagpabili sa pagkasagrado sa maong mga okasyon angayng magtukmod kanato sa pag-adyas sa atong mga cell phone ug pager aron dili kita mabalda o ang uban? Kon adunay dinaliang butang nga kinahanglang ato dayong tagdon, kinahanglang atong atimanon kini sa gawas sa dapit tigomanan. Kon dili man, angay natong hikayon nga maatiman ang atong personal ug sekular nga mga kalihokan sa laing mga panahon ug dili nianang gigahin alang sa pagsimba.​—1 Cor. 10:24.

Hinaot nga ang paagi sa atong paggamit ug cellular nga mga telepono o bisan unsang elektronikong himan kanunayng magpakitag konsiderasyon sa uban ug halalom nga pagtahod sa espirituwal nga mga butang.