Magmatakdo nga Pagkadugtong
1 Unsa ka subsob nga ikaw nahingangha sa batid nga pagkadesinyo sa lawas sa tawo? (Sal. 139:14) Ang matag sangkap sa lawas nagalihok nga kaharmonya sa ubang mga sangkap. Gipakasama sa Pulong sa Diyos ang Kristohanong kongregasyon ngadto sa maayong pagkahiusa nga lawas. Ilalom sa Ulo, si Kristo, ang tanang membro sa kongregasyon “takdo nga pagkadugtong ug gihimong magtambayayongay pinaagi sa matag lutahan nga naghatag sa gikinahanglan.” (Efe. 4:16a) Busa, si Jehova nakaarang sa paggamit sa iyang nahiusang katawhan sa pagpalampos sa kahibulongang mga butang.
2 Ang mga membro sa unang-siglong kongregasyon milihok nga “nagkauyon” sa pag-atiman sa espirituwal ug materyal nga mga panginahanglan sa usag usa. (Buhat 2:44-47) Uban sa pagpaluyo ni Jehova, sila nagkahiusa sa pag-atubang ug pagbuntog sa grabeng pagsupak. (Buhat 4:24-31) Ilang gimantala ang mensahe sa Gingharian bisan asa sila miadto, nga nagkobre sa mga lugar nga nailhan kaniadto uban sa maayong balita. (Col. 1:23) Sa modernong panahon, ang Kristohanong kongregasyon nagkahiusa sa pagpalampos niining samang mga butang sa mas dakong sukod. Unsang mga butanga ang nakatabang sa pagpalampos niini nga panaghiusa?
3 Nakabig Pinaagi sa Pagtulon-an sa Diyos: Sa tibuok yuta, kita nagkahiusa sa atong pagsimba. Sa unsang paagi posible kini? Atong giila ang makitang galamiton ni Jehova sa pagtaganag espirituwal nga “pagkaon sa hustong panahon.” (Mat. 24:45) Gipabilhan usab nato pag-ayo ang “mga gasa nga mga lalaki” nga iyang gihatag ingong mga magtutudlo diha sa kongregasyon. Samtang mapainubsanon natong dawaton ang mga tagana ni Jehova sa pagpakaon kanato sa espirituwal, ang atong pagsabot sa Pulong sa Diyos motubo ug mopalihok sa sulod nato sa usa ka naandang tinguha sa pagsundog kang Jesus ingong iyang mga tinun-an. Kinahanglang magpadayon kita sa pagtuon sa Pulong sa Diyos, nga masibotong maningkamot nga “makadangat sa pagkausa sa pagtuo.” (Efe. 4:8, 11-13) Mitabang ka ba sa pagpalambo sa atong espirituwal nga panaghiusa pinaagi sa pagbasa sa Bibliya kada adlaw?
4 Nagkahiusa Pinaagi sa Kristohanong Panag-ubanay: Ang gugma nagakabig kanato diha sa suod nga panag-ubanay sa Kristohanong mga tigom. Sa maong mga tigom, atong ‘gihunahuna ang matag usa.’ (Heb. 10:24, 25) Kini naglangkit sa pagtan-aw saylo pa sa panggawas nga panagway ug sa pagkaila gayod sa atong mga igsoon, nga magtan-aw kanila sumala sa pagtan-aw ni Jehova kanila, ingong tilinguhaon. (Hag. 2:7) Samtang atong paminawon ang ilang mga kapahayagan sa pagtuo, molalom ang atong gugma alang kanila ug mapalig-on ang atong panaghiusa. Nailhan ka ba ingong usa nga regular nga tigtambongan sa mga tigom sa kongregasyon?
5 Mga Isigkamagbubuhat Diha sa Kanataran: Ang pagsangyaw sa maayong balita duyog sa atong mga isigkamagtutuo nagpahiusa kanato sa pagbuhat sa kabubut-on sa Diyos. Gipabilhan ni apostol Pablo ang iyang “mga isigkamagbubuhat sa gingharian sa Diyos.” (Col. 4:11) Ang pagpaambit ug mga eksperyensiya ug pagtabang sa usag usa samtang anaa sa ministeryo makatabang kanato sa pagpalampos sa gisugo kanato nga mga Kristohanon ug makapalig-on sa atong bugkos sa panaghiusa.—Col. 3:14.
6 Makapahiusang Impluwensiya sa Balaang Espiritu: Samtang makugihon natong buhaton ang iyang kabubut-on, ihatag ni Jehova kanato ang iyang espiritu. Kini motabang kanato sa pagsulbad sa mga kasungian ug mag-uban pagpuyo diha sa panaghiusa. (Sal. 133:1) Mopalihok kini kanato nga “mosunod sa pagkausa sa espiritu sa nagahiusang bugkos sa pakigdait.” (Efe. 4:3) Ang matag usa kanato makapalambo sa panaghiusa nga naglungtad taliwala sa katawhan sa Diyos pinaagi sa pagpasundayag sa bunga sa espiritu diha sa atong mga pakiglabot sa usag usa.—Gal. 5:22, 23.
7 Ang pag-alagad nga nahiusa ilalom sa pagkaulo ni Kristo “nagpatubo sa lawas alang sa pagpalig-on sa kaugalingon niini diha sa gugma.” (Efe. 4:16b) Dugang pa, kini maghimaya kang Jehova, “ang Diyos nga nagahatag ug kalinaw.”—Roma 16:20.