Ipakita ang Mahigugmaong Kaayohan sa “mga Bata nga Ilo-sa-Amahan”
1 Si Jehova maoy “amahan sa mga bata nga ilo-sa-amahan.” (Sal. 68:5) Ang iyang kabalaka alang sa ilang kaayohan gibanaag diha sa sugo nga iyang gihatag sa karaang nasod sa Israel: “Dili ninyo sakiton ang bisan kinsang babayeng balo o batang ilo-sa-amahan. Kon ikaw magsakit kaniya, nan kon siya motuaw kanako, sa walay pakyas akong dunggon ang iyang pagtuaw.” (Ex. 22:22, 23) Ang Balaod sa Diyos naglakip usab sa mga kahikayan sa pagtabang sa maong mga tawo sa ilang materyal nga mga panginahanglan. (Deut. 24:19-21) Ilalom sa Kristohanong kahikayan, ang matuod nga mga magsisimba gitambagan sa “pag-atiman sa mga ilo ug sa mga babayeng balo sa ilang kasakitan.” (Sant. 1:27) Sa unsang paagi atong masundog ang mahigugmaong interes ni Jehova alang niadtong gimatuto sa usay-ginikanan o nabahin-sa-relihiyon nga mga pamilya?
2 Espirituwal nga Pagbansay: Kon ikaw nag-inusara nga ginikanan o may di-magtutuong kapikas, ang pagdumalag regular nga pagtuon sa Bibliya sa balay uban sa imong mga anak mahimong malisod. Apan ang regular ug makahuloganon nga pagtuon sa Bibliya hinungdanon kon sila molambo man ingong balanse, hamtong nga mga tawo. (Prov. 22:6) Ang adlaw-adlaw nga mga panaghisgot uban kanila bahin sa espirituwal nga mga butang hinungdanon usab. (Deut. 6:6-9) Usahay, mobati ka tingalig kaluya, apan ayaw pag-undang. Dangop kang Jehova alang sa kusog ug giya samtang ikaw “magpadayon sa pagmatuto [sa imong mga anak] sa disiplina ug sa pagdumala-sa-kaisipan ni Jehova.”—Efe. 6:4.
3 Kon nagkinahanglan kag tabang sa pag-atiman sa imong Kasulatanhong mga kaakohan, ipahibalo ang imong mga panginahanglan ngadto sa mga ansiyano. Mahimong makahatag silag praktikal nga mga sugyot o makatabang kanimo sa pagtukod ug maayong espirituwal nga rutina alang sa imong panimalay.
4 Kon sa Unsang Paagi Makatabang ang Uban: Sa unang siglo, si Timoteo nahimong masibotong alagad ni Jehova bisan pag nagtubo diha sa usa ka nabahin-sa-relihiyon nga panimalay. Ang makugihong mga paningkamot sa iyang inahan ug apohan nga babaye sa pagtudlo kaniya sa balaang mga sinulat sa bata pa siya sa way-duhaduha dakog gikatabang niana. (Buh. 16:1, 2; 2 Tim. 1:5; 3:15) Apan, nakabenepisyo usab siya tungod sa pagpakig-uban sa ubang mga Kristohanon, lakip kang apostol Pablo, kinsa nagtumong kang Timoteo ingong iyang “hinigugma ug matinumanong anak diha sa Ginoo.”—1 Cor. 4:17.
5 Mao man usab karong adlawa, pagkamapuslanon kon ang hamtong sa espirituwal nga mga igsoong lalaki ug babaye magpakitag mahigugmaong interes sa mga batang lalaki ug babaye nga ilo-sa-amahan diha sa kongregasyon! Nakaila ka ba sa ngalan sa matag usa kanila? Nakig-estorya ka ba kanila diha sa Kristohanong mga tigom ug sa ubang mga okasyon? Dapita sila sa pagduyog kanimo diha sa ministeryo sa kanataran. Tingali paubanon nimo sila usahay, duyog sa ilang nag-inusara o di-magtutuo nga ginikanan, sa inyong pamilyahanong pagtuon o sa mga kahikayan alang sa makaayo nga paglingawlingaw. Kon isipon ka niining mga bataa ingong ilang higala, lagmit gayod nga ilang sundon ang imong panig-ingnan ug dawaton ang imong pagdasig.—Filip. 2:4.
6 Si Jehova interesado kaayo sa mga batang lalaki ug babaye nga ilo-sa-amahan, ug siya nagapanalangin sa atong mahigugmaong mga paningkamot sa pagtabang kanila sa paghimo sa kamatuoran nga ila na. Daghang nagtubo diha sa usay-ginikanan o nabahin nga mga panimalay ang nakadawat sa maong pagdasig ug karon matinumanong nag-alagad ingong mga payunir, ministeryal nga alagad, ansiyano, nagapanawng magtatan-aw, misyonaryo, o mga membro sa pamilyang Bethel. Hinaot kitang tanan mangitag mga paagi nga ‘magpasangkad’ sa atong pagmahal alang sa mga ilo-sa-amahan, agig pagsundog sa atong langitnong Amahan.—2 Cor. 6:11-13.