Pagtuman sa Atong Panaad sa Pahinungod
1 Kon ikaw nabawtismohan di pa dugay o mga dekada na ang miagi, lagmit mahinumdoman pa nimo ang maong hinungdanong hitabo sa imong kinabuhi. Ang atong bawtismo dili mao ang kataposan kondili, hinuon, ang sinugdanan sa tibuok-kinabuhi nga dedikadong pag-alagad nga molungtad sa walay kataposan. (1 Juan 2:17) Unsay nalangkit sa pagtuman sa atong panaad sa pahinungod?
2 Sunda ang Panig-ingnan ni Kristo: Human mabawtismohi, “gisugdan [ni Jesus] ang iyang buluhaton,” nga nagmantala sa “maayong balita sa gingharian sa Diyos.” (Luc. 3:23; 4:43) Sa samang paagi, sa dihang gipasimbolohan nato ang atong pahinungod kang Jehova pinaagi sa bawtismo, kita nahimong ordinadong mga ministro sa maayong balita. Bisan tuod nagkinahanglag dakong panahon ug paningkamot aron mabatonan ang materyal nga mga kinahanglanon sa kinabuhi, ang atong pangunang buluhaton mao ang Kristohanong ministeryo. (Mat. 6:33) Inay maningkamot nga makabaton ug bahandi ug pagkainila, kadtong napahinungod sa Diyos nagtinguha sa ‘paghimaya sa ilang ministeryo,’ sama sa gihimo ni apostol Pablo. (Roma 11:13) Imo bang ampingan ang imong pribilehiyo sa pag-alagad kang Jehova ug buhaton ang kutob sa maarangan aron matuman kana?
3 Sama sa kahimtang ni Jesus, kinahanglan natong ‘suklan ang Yawa.’ (Sant. 4:7) Gitental ni Satanas si Jesus human sa Iyang bawtismo, ug sa samang paagi iyang gitumong ang dedikadong mga alagad ni Jehova karong adlawa. (Luc. 4:1-13) Tungod kay nalibotan man kita sa kalibotan ni Satanas, kinahanglan natong disiplinahon ang atong kaugalingon, nga likayan ang bisan unsang butang nga maghugaw sa atong hunahuna o magdaot sa atong kasingkasing. (Prov. 4:23; Mat. 5:29, 30) Gitambagan ang mga Kristohanon nga sila “dili . . . mahimong moambit sa ‘lamesa ni Jehova’ ug sa lamesa sa mga demonyo.” (1 Cor. 10:21) Kini nagkinahanglan nga kita magbantay batok sa di-maayong kalingawan, daotang pakig-ubanay, ug sa mga kapeligrohan diha sa Internet. Kini nagkinahanglan usab nga atong isalikway ang apostatang mga basahon. Ang pagkamabinantayon niining bahina ug sa uban pang mga taktika ni Satanas motabang kanato sa pagtuman sa atong panaad sa pahinungod.
4 Gamita ang mga Tagana sa Diyos: Aron matabangan kita sa pagtuman sa atong panaad sa pahinungod, si Jehova nagtagana ug tabang pinaagi sa iyang Pulong ug sa Kristohanong kongregasyon. Himoa ang pagbasa sa Bibliya ug pag-ampo nga bahin sa imong adlaw-adlaw nga rutina. (Jos. 1:8; 1 Tes. 5:17) Magkalipay diha sa mga tigom sa kongregasyon. (Sal. 122:1) Pakig-uban niadtong may kahadlok kang Jehova ug sa iyang mga sugo.—Sal. 119:63.
5 Uban sa tabang sa Diyos, imong matuman ang imong panaad sa pahinungod ngadto kang Jehova ug maangkon ang kalipay sa pag-alagad kaniya sa walay kataposan.—Sal. 22:26, 27; Filip. 4:13.