Ugmara ang Pagkasuod Kang Jehova

1. Unsay naamgohan sa usa ka igsoong babaye bahin sa iyang espirituwal nga rutina?

¹ “Ako anaa sa kamatuoran sa milabayng 20 ka tuig o kapin pa pinaagi lamang sa pagtambong sa mga tigom ug pagpakigbahin diha sa ministeryo sa kanataran,” miangkon ang usa ka Kristohanong igsoong babaye. Hinunoa, siya nagpadayon: “nakahinapos ako nga bisan kon kining mga butanga hinungdanon, kon kini lang dili ako mapalig-on sa dihang ang mga kahimtang mosugod pagkalisod. . . . Naamgohan ko karon nga kinahanglan kong ipasibo ang akong panghunahuna ug sugdan ang usa ka mapuslanong programa sa pagtuon aron mailhan ko gayod si Jehova ug makadangat sa paghigugma kaniya ug pag-apresyar sa kon unsay gihatag sa iyang Anak kanato.”

2. Nganong hinungdanong ugmaron ang suod nga relasyon uban kang Jehova?

² Ang pagtukod ug suod nga personal nga relasyon uban kang Jehova nagkinahanglag paningkamot. Kini nagkinahanglag labaw pa kay sa pagsunod lamang sa rutina sa Kristohanong kalihokan. Kon mapakyas kita sa suod nga pag-ampo kang Jehova sa regular nga paagi, sa ngadtongadto siya mahimong sama sa usa ka kanhing suod nga higala nga wala na kitay komunikasyon. (Pin. 2:4) Susihon nato kon sa unsang paagi ang personal nga pagtuon sa Bibliya ug pag-ampo makatabang kanato sa pag-ugmad ug suod nga relasyon uban kang Jehova.​—Sal. 25:14.

3. Unsang paagi sa personal nga pagtuon ang motabang kanato nga masuod sa Diyos?

³ Pag-ampo ug Pagpamalandong Hinungdanon: Ang personal nga pagtuon nga makapalagsik sa kasingkasing naglangkit ug labaw pa kay sa pagbadlis lamang sa pangunang mga punto sa gitun-ang materyal ug pagtan-aw sa gisitar nga mga teksto. Ang personal nga pagtuon nagpasabot nga palandongon nato kon unsay gibutyag sa impormasyon bahin sa mga hiyas, sukdanan, ug personalidad ni Jehova. (Ex. 33:13) Ang pagkasabot sa espirituwal nga mga butang moapektar sa atong mga emosyon ug mopalihok kanato sa paghunahuna bahin sa atong kaugalingong kinabuhi. (Sal. 119:​35, 111) Ang personal nga pagtuon angayng himoon uban ang tumong nga makigsuod kang Jehova. (Sant. 4:8) Ang seryosong pagtuon nanginahanglag panahon ug hustong palibot, ug ang regular nga pagtuon nanginahanglag disiplina. (Dan. 6:10) Bisag puliki kaayo ang imong kinabuhi, naggahin ka bag panahon matag adlaw sa pagpamalandong sa kahibulongang mga hiyas ni Jehova?​—Sal. 119:147, 148; 143:5.

4. Sa unsang paagi ang pag-ampo maylabot sa personal nga pagtuon motabang kanato sa pag-ugmad sa pagkasuod kang Jehova?

⁴ Ang kinasingkasing nga pag-ampo maoy hinungdanong bahin sa makahuloganong personal nga pagtuon. Aron ang mga kamatuoran sa Bibliya mopalihok sa atong kasingkasing ug motukmod kanato sa ‘paghatag ug sagradong pag-alagad sa Diyos uban ang diyosnong kahadlok ug kalisang,’ gikinahanglan nato ang balaang espiritu sa Diyos. (Heb. 12:28) Busa, angay natong sugdan ang matag pagtuon pinaagi sa paghangyo kang Jehova alang sa iyang espiritu. (Mat. 5:3) Samtang palandongon nato ang Kasulatan ug gamiton ang mga tabang sa pagtuon nga gitagana sa organisasyon ni Jehova, atong gibuksan ang atong kasingkasing ngadto kang Jehova. (Sal. 62:8) Ang pagtuon nianang paagiha maoy buhat sa pagsimba nga niana atong gipahayag ang atong debosyon kang Jehova ug gipalig-on ang atong pagkasuod kaniya.​—Jud. 20, 21.

5. Nganong hinungdanon alang kanato nga palandongon ang Pulong sa Diyos matag adlaw?

⁵ Sama sa tanang relasyon, ang atong relasyon uban kang Jehova kinahanglang atimanon kanunay aron padayon kining mouswag sa tibuok natong kinabuhi. Busa, hinaot mogahin kitag panahon matag adlaw sa pagpakigsuod sa Diyos, sa pagkasayod nga siya, sa baylo, makigsuod kanato.​—Sal. 1:​2, 3; Efe. 5:​15, 16.