“Magpasangkad”

1. Adunay unsang responsabilidad ang matag usa kanato?

¹ Diha sa Kristohanong panag-igsoonay, ang matag usa adunay responsabilidad sa paghatag ug kainit sa kongregasyon. (1 Ped. 1:22; 2:17) Ang maong kainit mapatungha sa dihang kita “magpasangkad” sa atong malumong mga pagmahal alang sa usag usa. (2 Cor. 6:​12, 13) Nganong hinungdanon nga mailhan pag-ayo ang atong mga igsoong lalaki ug babaye?

2. Nganong hinungdanon nga ugmaron ang mga panaghigalaay uban sa mga isigkamagtutuo?

² Molig-on ang mga Panaghigalaay: Sa dihang mas masinati nato ang atong mga isigkamagtutuo, mas pa natong mapabilhan ang ilang pagtuo, paglahutay, ug uban pang maayong mga hiyas. Dili na kaayo hinungdanon kanato ang ilang mga kahuyangan, ug molambo ang mga bugkos sa panaghigalaay. Kay nakaila pag-ayo sa usag usa, kita mas nasangkapan sa pagpalig-on ug paghupay sa usag usa. (1 Tes. 5:11) Kita mahimong “makapalig-ong tabang” ngadto sa usag usa aron masuklan ang makadaot nga mga impluwensiya sa kalibotan ni Satanas. (Col. 4:11) Tungod sa malisod nga kataposang mga adlaw, pagkamapasalamaton nato nga nakabaton ug maayong mga higala taliwala sa katawhan ni Jehova!​—Prov. 18:24.

3. Sa unsang paagi kita mahimong makapalig-ong tabang ngadto sa uban?

³ Ang suod nga mga higala mahimong linaing tinubdan sa kalig-on ug kahupayan sa dihang masugamak kitag grabeng mga pagsulay. (Prov. 17:17) Ang usa ka Kristohanong babaye kinsa nakigbisog sa mga pagbati sa pagkawalay-pulos nahinumdom: “Dunay mga higala kinsa mosulti ug positibong mga butang bahin kanako aron sa pagtabang kanako nga mabuntog ang negatibong mga hunahuna.” Ang maong mga higala maoy mga panalangin gikan kang Jehova.​—Prov. 27:9.

4. Sa unsang paagi mailhan nato pag-ayo ang uban diha sa kongregasyon?

⁴ Pagpakitag Interes sa Uban: Sa unsang paagi atong mapasangkad ang atong malumong mga pagmahal alang sa mga isigkamagtutuo? Gawas pa sa pagtimbaya sa uban diha sa Kristohanong mga tigom, paningkamoti nga maapil sila sa makahuloganong panaghisgot. Ipakita ang personal nga interes nga dili manghilabot sa ilang pribadong kinabuhi. (Filip. 2:4; 1 Ped. 4:15) Ang laing paagi sa pagpakitag interes sa uban mao ang pagdapit kanila sa pagpangaon. (Luc. 14:12-14) O tingali mahikay nimo ang pagpakig-uban kanila diha sa ministeryo sa kanataran. (Luc. 10:1) Samtang mohimo kitag unang lakang sa pag-ilaila pag-ayo sa atong mga igsoon, atong mapalambo ang panaghiusa diha sa kongregasyon.​—Col. 3:14.

5. Unsa ang usa ka paagi sa pagpasangkad sa atong mga pagpakighigalaay?

⁵ Makiling ba kita sa pagpili ug suod nga mga higala gikan lamang sa taliwala sa atong mga katalirongan o niadtong susama natog mga interes? Dili nato angayng tugotan ang maong mga butang nga maglimite sa mga panaghigalaay nga atong pagaugmaron diha sa kongregasyon. Si David ug Jonatan maingon man si Ruth ug Noemi nakaugmad ug lig-ong mga bugkos sa panaghigalaay bisan pa sa kalainan sa edad ug kagikan. (Ruth 4:15; 1 Sam. 18:1) Imo bang mapasangkad ang imong mga pagpakighigalaay? Ang paghimo niana mahimong magdalag wala-damhang mga panalangin.

6. Unsa ang pipila ka kaayohan sa pagpasangkad sa atong malumong mga pagmahal alang sa atong mga igsoon?

⁶ Pinaagi sa pagpasangkad sa atong malumong mga pagmahal alang sa uban, gipalig-on nato ang usag usa ug gipalambo ang pakigdait diha sa kongregasyon. Dugang pa, si Jehova mismo magpanalangin kanato tungod sa gugma nga atong gipakita sa atong mga igsoon. (Sal. 41:​1, 2; Heb. 6:10) Nganong dili nimo himoong tumong nga makasinati pag-ayo ug daghang igsoon kutob sa maarangan?