Eskedyul sa Pamilya—Mga Tigom sa Kongregasyon
1 Kon ikaw usa ka Kristohanong ginikanan, gusto nimong modako ang imong mga anak nga mahigugma ug moalagad kang Jehova ug, sa ngadtongadto, makaangkon ug kinabuhing walay kataposan sa bag-ong kalibotan nga gisaad sa Diyos. Sa unsang paagi imong matabangan sila sa pag-una sa pagsimba kang Jehova sa ilang kinabuhi? Ang pangunang paagi maoy pinaagi sa imong panig-ingnan. (Prov. 20:7) Nahinumdom sa panig-ingnan sa iyang magtutuong inahan, usa ka igsoong babaye miingon: “Wala gyod mi magduhaduha kon motambong ba mi sa tigom o dili.” Natandog gayod siya niini.
2 Gipabilhan ba sa imong pamilya ang katuyoan sa mga tigom sa kongregasyon? Ang instruksiyon nga atong madawat niining mga tigoma makapadasig kanato sa pagbuhat sa kabubut-on sa Diyos, ug ang panag-ubanay nga atong matagamtam uban sa atong mga igsoon maoy usa ka bililhon kaayong tuboran sa pagdasig. (Isa. 54:13; Roma 1:11, 12) Hinunoa, ang pangunang katuyoan sa maong mga tigom mao ang pagdayeg kang Jehova “taliwala sa nagkatigom nga panon.” (Sal. 26:12) Ang Kristohanong mga tigom makahatag kanato ug mga kahigayonan sa pagpasundayag sa atong gugma kang Jehova ug sa pagsimba kaniya.
3 “Pagbantay Pag-ayo”: Ang pagpabili sa sagradong katuyoan sa atong mga panagkatigom motukmod kanato sa “pagbantay pag-ayo” nga kita dili inanayng makaugmad ug batasan sa pagpalta sa mga tigom aron atimanon ang di-kaayo hinungdanong mga butang. (Efe. 5:15, 16; Heb. 10:24, 25) Sa dihang himoon ang inyong eskedyul sa pamilya, mahimo kang magsugod pinaagi sa pagmarka sa mga oras alang sa mga tigom sa kongregasyon. Dayon paneguroa nga ang ubang mga kalihokan dili makabalda niana. Paneguroa nga kinahanglang unahon gayod sa imong pamilya ang pagtambong sa tigom.
4 Dili ba kita mapalihok sa dihang atong mabasa bahin sa atong mga igsoon nga nagbuntog sa mga babag aron makatambong ug mga tigom ug mga asembliya? Bisan tuod dili tingali ingon niana ang imong mga kahimtang, lagmit ikaw usab nag-atubang ug mga suliran. Lisodlisoron gayod ni Satanas ang katawhan sa Diyos sa pagsimba kang Jehova. Bisan pa niana, magmasaligon nga mamatikdan gayod sa imong mga anak ang determinadong mga panikaysikay sa imong pamilya sa pagtambong sa mga tigom sa kongregasyon. Sa pagkatinuod, pinaagi sa paghimo niana, ikaw makahatag ug espirituwal nga gasa ngadto kanila nga dili gayod makalimtan.