Ugmara ang Katakos sa Pagpangatarongan sa Uban
1. Unsang asoy sa Bibliya ang atong pagahisgotan, ug ngano?
1 Ang pakigpulong ni apostol Pablo sa usa ka sinagoga sa Antioquia sa Pisidia, sumala sa narekord sa Buhat 13:16-41, naghatag ug maayong pananglitan kon unsaon pagpangatarongan sa uban. Gikonsiderar ni Pablo ang kagikan ug panghunahuna sa iyang mga mamiminaw ug gipasibo ang iyang pagpresentar sa maayong balita sumala niana. Samtang atong susihon kining asoya, atong tagdon kon sa unsang paagi atong mahimo usab kana diha sa atong ministeryo.
2. Unsay atong makat-onan gikan sa paagi ni Pablo sa pagsugod sa iyang pakigpulong?
2 Pangitag Punto nga Gikauyonan: Bisan tuod ang mensahe ni Pablo nagpunting sa pangunang papel ni Jesus sa pagpalampos sa katuyoan sa Diyos, wala sugdi ni Pablo ang iyang pakigpulong pinaagi sa paghisgot nianang puntoha. Hinunoa, iyang gihisgotan ang bahin sa usa ka butang nga iyang gikauyonan uban sa iyang mga mamiminaw nga ang kadaghanan maoy mga Hudiyo—ang kasaysayan sa mga Hudiyo. (Buh. 13:16-22) Sa samang paagi, kita mahimong mas epektibo sa pagkombinsir sa uban kon mangita kitag punto nga atong gikauyonan uban kanila. Mahimong nagpasabot kini nga atong dasigon sila sa pagpahayag sa ilang opinyon pinaagi sa pagsuknag mataktikanhong mga pangutana ug sa pagpaminaw pag-ayo sa ilang tubag aron maila kon unsa gayoy hinungdanon alang kanila.
3. Nganong nalisdan ang mga mamiminaw ni Pablo sa pagdawat nga si Jesus mao ang sinaad nga Mesiyas?
3 Sa paghisgot sa kasaysayan sa mga Hudiyo, gipahinumdoman ni Pablo ang iyang mamiminaw bahin sa saad sa Diyos sa pagpatunghag Manluluwas gikan sa kaliwat ni David. Ugaling lang, daghang Hudiyo ang nagpaabot ug usa ka bayaning sundalo nga magpahigawas sa mga Hudiyo gikan sa pagmando sa mga Romano ug magtuboy sa Hudiyohanong nasod ibabaw sa tanang kanasoran. Dayag nga sila nahibalo nga si Jesus gisalikway sa Hudiyong relihiyosong mga lider sa Jerusalem, gitugyan ngadto sa Romanong mga awtoridad, ug gipatay. Sa unsang paagi makombinsir sila ni Pablo nga kining maong Usa mao ang gisaad nga Mesiyas?
4. Sa unsang paagi mahanasong nangatarongan si Pablo sa iyang Hudiyong mga mamiminaw?
4 Ipahiuyon ang Imong Paagi sa Pagpakig-estorya: Kay nahibalo sa hunahuna sa iyang mamiminaw, gigamit ni Pablo ang Kasulatan sa pagpangatarongan kanila pinasukad sa mga butang nga ila nang gituohan. Pananglitan, gipailaila niya si Jesus ingong kaliwat ni David ug ang usa nga giila ni Juan Bawtista, kinsa giisip sa kadaghanan nga usa ka manalagna sa Diyos. (Buh. 13:23-25) Gipunting ni Pablo nga sa pagsalikway kang Jesus ug paghukom kaniya sa kamatayon, ang relihiyosong mga lider ‘nagtuman sa mga butang nga gisulti sa mga Manalagna.’ (Buh. 13:26-28) Dugang pa, gipatin-aw niya nga dunay mga saksing-nakakita nga si Jesus gibanhaw gikan sa mga patay, ug iyang gipunting ang ilang pagtagad ngadto sa sinating mga teksto sa Kasulatan nga natuman sa pagkabanhaw ni Jesus.—Buh. 13:29-37.
5. (a) Sa unsang paagi gipahiuyon ni Pablo ang iyang paagi sa pagpakig-estorya sa dihang nakig-estorya sa Gregong mga mamiminaw? (b) Sa unsang paagi atong masundog ang panig-ingnan ni Pablo sa dihang magsangyaw diha sa atong teritoryo?
5 Sa laing bahin, sa dihang nakig-estorya sa Gregong mga mamiminaw didto sa Areopago sa Atenas, gigamit ni Pablo ang laing paagi. (Buh. 17:22-31) Apan mao ra gihapong mensahea ang iyang gipresentar, ug sa maong duha ka higayon maayog resulta ang iyang mga paningkamot. (Buh. 13:42, 43; 17:34) Sa samang paagi karon, kita mahimong mas epektibo diha sa atong ministeryo kon mangita kitag punto nga atong gikauyonan uban sa atong mga mamiminaw ug kon atong ipahiuyon ang atong paagi sa pagpakig-estorya sumala sa ilang kagikan ug panghunahuna.