Ang Espiritu sa Pagboluntaryo Magdalag mga Panalangin
1. Sa unsang paagi gipasundayag ni David ug Nehemias ang espiritu sa pagboluntaryo?
1 Sa dihang gibiaybiay ni Goliat ang kasundalohan sa Israel, si bisan kinsang sundalo makahimo unta sa pagpakig-away kaniya. Apan usa ka batan-ong magbalantay sa karnero, nga wala mabansay sa pagpakiggubat, ang miboluntaryo. (1 Sam. 17:32) Sa dihang ang nadestiyero nga mga Hudiyo mibalik sa Jerusalem apan wala makatukod pag-usab sa mga paril, usa ka magtitiing sa bino sa hari sa Persia ang miboluntaryo sa pagbiya sa iyang hataas nga katungdanan sa palasyo ug mipaingon sa Jerusalem aron sa pag-organisar sa buluhaton. (Neh. 2:5) Gipanalanginan ni Jehova si David ug si Nehemias tungod sa espiritu nga ilang gipakita.—1 Sam. 17:45, 50; Neh. 6:15, 16.
2. Nganong angayng ipasundayag sa mga Kristohanon ang espiritu sa pagboluntaryo?
2 Karon, ang espiritu sa pagboluntaryo wala ipakita sa kalibotan. Niining “kataposang mga adlaw,” ang mga tawo hilabihan ka puliki, ug daghan ang ‘mahigugmaon sa ilang kaugalingon.’ (2 Tim. 3:1, 2) Ang usa ka tawo dali ra kaayong malinga sa personal nga mga intereses nga iyang mataligam-an ang mga kahigayonan sa pagboluntaryo kon adunay panginahanglan sa pagtabang sa uban. Hinunoa, ingong mga Kristohanon, kita buot mosundog kang Jesus, kinsa nanguna sa pagtabang sa uban. (Juan 5:5-9; 13:12-15; 1 Ped. 2:21) Sa unsang paagi atong ikapasundayag ang espiritu sa pagboluntaryo, ug unsa ang mga panalangin nga atong madawat?
3. Sa unsang paagi ang espiritu sa pagboluntaryo makaamot sa mga tigom sa kongregasyon?
3 Alang sa Atong mga Igsoon: Kita makahatag ug “espirituwal nga gasa” sa uban pinaagi sa pagboluntaryo sa pagkomento kon ang mga tigom nanginahanglag pagpakig-ambit sa mamiminaw. (Roma 1:11) Ang pagkomento magpasidungog kang Jehova, magpatisok pa gayod sa kamatuoran nganha sa atong hunahuna ug kasingkasing, ug makadugang sa atong kalipay sa mga panagkatigom. (Sal. 26:12) Kita usab makaboluntaryo sa paghatag ug bahin sa Teokratikanhong Tunghaan sa Ministeryo kon nagkinahanglan ug kapuli. Kini motabang kanato sa pagpauswag sa atong katakos sa pagpanudlo.
4. Unsa ang pipila ka paagi nga atong ikapasundayag ang espiritu sa pagboluntaryo?
4 Ang mga igsoong lalaki makapasundayag ug espiritu sa pagboluntaryo pinaagi sa pagpangab-ot ug mga kaakohan diha sa kongregasyon. (Isa. 32:2; 1 Tim. 3:1) Ang tanan makatabang sa hapsay nga pagpalampos sa mga asembliya ug mga kombensiyon pinaagi sa pagboluntaryo sa pagtrabaho diha sa nagkalainlaing mga departamento. Kon kita moboluntaryo sa pagsangyaw uban sa nagapanawng magtatan-aw o sa pagtaganag pagkaon alang kaniya, kini moresulta sa “pagdinasigay.” (Roma 1:12) Kon kita motanyag ug mapuslanong tabang ngadto sa mga batang ilo sa amahan, mga balo, mga masakiton ug maluyahon, mga inahan nga may gagmayng mga anak, ug sa uban pa diha sa kongregasyon, atong masinati ang kalipay ug ang pag-uyon ni Jehova.—Prov. 19:17; Buh. 20:35.
5. Unsang mga butanga maylabot sa Kingdom Hall ang nanginahanglan ug kinabubut-ong mga boluntaryo?
5 Ang laing paagi nga kita makaboluntaryo sa atong panahon ug kusog mao ang pagtabang sa pagpanglimpiyo ug pagmentinar sa Kingdom Hall. Dugang pa, tungod kay daghang tawo ang nakadangat sa kamatuoran, adunay nagkadakong panginahanglan sa bag-ong mga Kingdom Hall ug mga boluntaryo sa pagtukod niini. Usa ka magtiayon miboluntaryo sa pagtabang sa lokal nga Regional Building Committee bisan pag wala silay kasinatian sa pagpanukod. Sa ngadtongadto, ang magtiayon nabansay ug karon nagtabang sa pagpayl ug mga tisa. Ang asawa miingon: “Ang pagpakigtambayayong sa uban miresulta ug suod kaayo nga panaghigalaay. Inigkatapos sa adlaw, kami gikapoy sa pisikal apan nalagsik sa espirituwal.”
6. Nganong ang ministeryo mao ang labing hinungdanon nga boluntaryong buluhaton nga atong mahimo?
6 Pinaagi sa Pagsangyaw: Ang labing hinungdanong pagboluntaryo nga atong mahimo karon mao ang pagsangyaw sa Gingharian. Samtang ang mga tawo matabangan nga makasabot ug makapadapat sa tambag sa Bibliya, sila makabaton ug kinabuhi nga may katuyoan ug kalig-on sa pagbuntog sa makadaot nga mga batasan. Ilang makat-onan ang makapadasig nga paglaom sa Bibliya bahin sa umaabot. Pinaagi sa paghatag ug edukasyon bahin sa Bibliya, kita naghimo ug makapalipay nga boluntaryong buluhaton nga may dumalayong mga kaayohan. (Juan 17:3; 1 Tim. 4:16) Basin ang atong mga kahimtang motugot kanato sa pagpakigbahin pa gayod niining buluhatona pinaagi sa pag-oksilyare o pagregular payunir, pagbalhin ngadto sa dapit diin mas dako ang panginahanglan sa mga magmamantala, o pagkat-on ug laing pinulongan.
7. Nganong ilabinang hinungdanon karon ang pagboluntaryo?
7 Si Haring David nagtagna nga sa panahon nga mosugod na pagmando ang Mesiyas, ang katawhan sa Diyos “magatanyag sa ilang kaugalingon nga kinabubut-on.” (Sal. 110:3) Tungod kay gipadali ni Jehova ang kataposang espirituwal nga pagpangani, adunay daghang buluhaton nga angay natong boluntaryohan. (Isa. 60:22) Ikaw ba miingon: “Ania ako! Ipadala ako”? (Isa. 6:8) Sa pagkatinuod, pinaagi sa atong pagpasundayag sa espiritu sa pagboluntaryo, atong mapahimut-an si Jehova ug atong maangkon ang dagayang mga panalangin.