“Siya Naghatag ug Gahom sa Gikapoy”
1 Kitang tanan kapoyon usahay. Kini dili lang tingali tungod sa atong trabaho o sa ubang pisikal nga kalihokan kondili tungod usab sa mga suliran nga atong giatubang niining “makuyaw nga mga panahong lisod sagubangon.” (2 Tim. 3:1) Ingong mga alagad ni Jehova, sa unsang paagi mabatonan nato ang espirituwal nga kusog nga atong gikinahanglan aron dili kita maluya sa atong ministeryo? Atong mahimo kini pinaagi sa pagsalig sa usa nga “mabaskog sa gahom,” si Jehova. (Isa. 40:26) Siya nahibalo sa atong mga panginahanglan ug interesado gayod sa pagtabang kanato.—1 Ped. 5:7.
2 Mga Tagana ni Jehova: Si Jehova nagpalig-on kanato pinaagi sa iyang balaang espiritu, ang mao ra gihapong gamhanan kaayong puwersa nga iyang gigamit sa paglalang sa uniberso. Ang espiritu sa Diyos motabang kanato nga “maulian sa kusog” kon kita maluya. (Isa. 40:31) Pangutan-a ang imong kaugalingon, ‘Kanus-a ang kataposang higayon nga ako espesipikong miampo alang sa balaang espiritu sa pagpalig-on kanako aron akong matuman ang akong Kristohanong mga obligasyon?’—Luc. 11:11-13.
3 Pinaagi sa pagbasa ug pagpamalandong sa inspiradong Pulong sa Diyos adlaw-adlaw ug sa regular nga pagbasa sa atong Kristohanong publikasyon aron kita malig-on sa espirituwal, kita mahisama sa lanubo nga “kahoy nga natanom sa daplin sa kasapaan sa tubig, nga mobunga sa iyang panahon ug ang iyang mga dahon dili malaya.”—Sal. 1:2, 3.
4 Si Jehova naggamit usab sa atong mga isigkamagtutuo, kinsa mahimong “makapalig-on nga tabang” kanato. (Col. 4:10, 11) Sila nagpalig-on kanato diha sa mga tigom sa kongregasyon pinaagi sa ilang makapalig-ong mga panagkabildo, mga komento, ug mga pakigpulong. (Buh. 15:32) Ang Kristohanong mga ansiyano ilabinang naghatag ug espirituwal nga tabang ug makapalagsik nga pagdasig.—Isa. 32:1, 2.
5 Ang Ministeryo: Kon mibati kag kaluya, ayawg hunong sa pagsangyaw! Dili sama sa ubang mga kalihokan, ang regular nga pagpakigbahin sa pagsangyaw makapalagsik gayod kanato. (Mat. 11:28-30) Ang pagsangyaw sa maayong balita motabang kanato nga masentro ang atong hunahuna sa Gingharian sa Diyos ug maghunahuna kanunay sa kinabuhing walay kataposan ug sa kahibulongang mga palaaboton niini.
6 Daghan pang angayng himoon sa dili pa laglagon kining daotang sistema. Kita may katarongan gayod sa pagpabiling malig-on sa atong pag-alagad, “nga nagasandig diha sa kusog nga gihatag sa Diyos.” (1 Ped. 4:11) Sa tabang ni Jehova, atong matapos ang atong buluhaton, tungod kay “siya naghatag ug gahom sa gikapoy.”—Isa. 40:29.