Magpadayon sa “Pagpamungag Daghan”
1 Mahulagwayong gitandi ni Jesus ang iyang kaugalingon nga mao ang matuod nga punoan sa paras, ang iyang Amahan mao ang Magtitikad, ug ang iyang dinihogan sa espiritu nga mga sumusunod mao ang mabungahong mga sanga. Sa paghubit sa buluhaton sa mahulagwayong Magtitikad, gipasiugda ni Jesus nga hinungdanong magpabilin gayod sa punoan sa paras. (Juan 15:1-4) Ang leksiyon mao nga ang tanang adunay suod nga relasyon kang Jehova kinahanglang mahisama sa mabungahong “matuod nga punoan sa paras,” si Jesu-Kristo. Kinahanglang magpadayon kita sa pagpamungag daghan diha sa ‘mga bunga sa espiritu’ ug sa mga bunga sa Gingharian.—Gal. 5:22, 23; Mat. 24:14; 28:19, 20.
2 Mga Bunga sa Espiritu: Ang atong espirituwal nga pag-uswag kasagarang masukod kon giunsa nato pagpasundayag ang mga bunga sa espiritu. Naningkamot ka ba sa pag-ugmad sa mga bunga sa espiritu sa Diyos pinaagi sa regular nga pagtuon ug pagpamalandong sa Pulong sa Diyos? (Filip. 1:9-11) Ayaw pagpanuko sa pag-ampo alang sa balaang espiritu sa pagpatunghag mga hiyas nga makahimaya kang Jehova ug makatabang kanimo nga magmauswagon kanunay sa espirituwal.—Luc. 11:13; Juan 13:35.
3 Ang pag-ugmad sa mga bunga sa espiritu motabang usab kanato nga mahimong mas masibotong mga ministro. Pananglitan, ang gugma ug pagtuo mopalihok kanato sa paggahin gayod ug panahon diha sa atong puliking eskedyul aron sa pagpakigbahin nga regular diha sa ministeryo. Ang mga hiyas nga sama sa pakigdait, hataas nga pailob, kalulot, kalumo, ug pagpugong sa kaugalingon motabang kanato kon unsay angay natong himoon kon may mga magsusupak. Ang kalipay magpaarang kanato nga magmatagbawon diha sa ministeryo bisan pag dili mosanong ang mga tawo.
4 Mga Bunga sa Gingharian: Buot usab kitang makapatunghag mga bunga sa Gingharian. Naglakip kana sa pagtanyag ug “halad sa pagdayeg, nga mao, ang bunga sa mga ngabil nga naghimog pagpahayag sa dayag sa . . . ngalan [ni Jehova].” (Heb. 13:15) Atong mahimo kini pinaagi sa masiboton ug makanunayong pagsangyaw sa maayong balita. Naningkamot ka ba sa pagpatunghag daghang bunga sa Gingharian pinaagi sa pagpauswag sa imong kaugalingong ministeryo?
5 Si Jesus nag-ingon nga ang iyang maunongong mga sumusunod magpatunghag lainlaing gidaghanon sa mga bunga. (Mat. 13:23) Busa, dili gayod nato itandi ang atong kaugalingon sa uban kondili atong ihatag kang Jehova ang atong kinamaayohan. (Gal. 6:4) Kon susihon nato ang atong kaugalingon sa matinud-anong paagi pinasukad sa Pulong sa Diyos, kita matabangan nga padayong mahimaya si Jehova pinaagi sa “pagpamungag daghan.”—Juan 15:8.