“Malipayon ang Tawo nga Nagpadayon sa Pag-antos sa Pagsulay”
1 Ang tanang Kristohanon kinahanglang mosagubang ug mga pagsulay. (2 Tim. 3:12) Kita mahimong makaagom ug mga balatian, kalisod sa panginabuhi, tentasyon, paglutos, o uban pang mga pagsulay. Ang mga pagsulay nga gipahamtang ni Satanas gituyo aron maluya kita ug dili na magmadasigon sa Kristohanong ministeryo, o mohunong pa gani sa pag-alagad sa Diyos. (Job 1:9-11) Sa unsang paagi ang pag-antos sa mga pagsulay mosangpot sa kalipay?—2 Ped. 2:9.
2 Pangandam sa mga Pagsulay: Si Jehova naghatag kanato sa iyang Pulong sa kamatuoran, nga naglakip sa rekord sa kinabuhi ug mga pagtulon-an ni Jesus. Pinaagi sa pagpatalinghog sa gisulti ni Jesus ug sa pagbuhat niana, kita makapahilunag lig-ong pundasyon ug sa ingon kita makapangandam sa mga pagsulay. (Luc. 6:47-49) Kita makakuha usab ug kalig-on gikan sa atong mga igsoon sa pagtuo, mga tigom sa kongregasyon, ug sa pinasukad sa Bibliya nga mga publikasyon sa matinumanon ug maalamong ulipon. Labaw sa tanan, kita makaampo usab kanunay sa Diyos.—Mat. 6:13.
3 Gihatagan usab kita ni Jehova ug paglaom. Sa dihang palig-onon nato ang atong pagtuo diha sa mga saad ni Jehova, ang atong paglaom mahimong “angkla sa kalag, nga seguro ug malig-on.” (Heb. 6:19) Sa panahon sa Bibliya, ang mga barko dili gayod mobiya sa pantalan nga walay angkla, bisag maayo pa ang panahon. Kay kon kalit lang nga mounos, ila dayong ihulog ang angkla aron dili maanod ang barko ug mabangga sa kabatoan. Sa samang paagi, kon atong palig-onon ang atong pagtuo diha sa mga saad sa Diyos karon, kini mopalig-on kanato sa dihang modangat ang samag-unos nga mga pagsulay. Ang mga pagsulay mahimong kalit lang nga modangat. Bisan tuod ug maayo ang sanong sa unang pagsangyaw nila ni Pablo ug Bernabe didto sa Listra, ang kahimtang kalit nga nausab sa dihang miabot ang mga magsusupak nga mga Hudiyo.—Buh. 14:8-19.
4 Ang Pag-antos Mosangpot sa Kalipay: Kon magpadayon kita sa pagsangyaw bisan pa sa pagsupak, magmalinawon ang atong hunahuna. Kita malipay nga isipong takos pakaulawan tungod kang Kristo. (Buh. 5:40, 41) Pinaagi sa pag-antos sa mga pagsulay, atong maugmad pa gayod ang pagkamapainubsanon, pagkamasinugtanon, ug pagkamalahutayon. (Deut. 8:16; Heb. 5:8; Sant. 1:2, 3) Kini motudlo kanato sa pagsalig kang Jehova, sa pagtuo sa iyang mga saad, ug sa pagdangop kaniya.—Prov. 18:10.
5 Kita nahibalo nga temporaryo lang ang mga pagsulay. (2 Cor. 4:17, 18) Ang mga pagsulay mohatag kanatog kahigayonan sa pagpasundayag sa kalalom sa atong gugma kang Jehova. Pinaagi sa pag-antos sa mga pagsulay, atong matubag ang mga akusasyon ni Satanas. Busa, dili kita mosurender! “Malipayon ang tawo nga nagpadayon sa pag-antos sa pagsulay, tungod kay sa pagkahimong inuyonan iyang madawat ang purongpurong sa kinabuhi.”—Sant. 1:12.