Gimahal Nato ang Atong mga Pribilehiyo!
1 Sukad sa paglungtad sa tawo, gihatagan ni Jehova ug nagkalainlaing pribilehiyo ang iyang mga alagad. Siya naghatag ug mga pribilehiyo ngadto sa mga lalaki ug babaye, tigulang ug bata, adunahan ug kabos. (Luc. 1:41, 42; Buh. 7:46; Filip. 1:29) Unsang mga pribilehiyo ang iyang gihatag kanato karon?
2 Pipila sa Atong mga Pribilehiyo: Pribilehiyo nato nga matudloan ni Jehova. (Mat. 13:11, 15) Ang pagdayeg kang Jehova pinaagi sa atong mga komento sa mga tigom sa kongregasyon maoy laing pribilehiyo nga atong mapahimuslan. (Sal. 35:18) Kita madasigong mokomento sa dihang kita may kahigayonan sa paghimo niana. Sa samang paagi, atong gilantaw ang matag asaynment diha sa kongregasyon ingong pribilehiyo, mao nga atong tumanon kana kutob sa atong maarangan. Regular ba kitang nakigbahin sa pribilehiyo sa pagpanghinlo ug pagmentinar sa Kingdom Hall?
3 Bisan tuod minilyon ang nagduhaduha kon pamation ba kaha sa Diyos ang ilang mga pag-ampo, dako natong pribilehiyo nga ang labing importanteng Persona sa uniberso nagapamati sa atong mga pag-ampo. (Prov. 15:29) Si Jehova mismo maminaw sa mga pag-ampo sa iyang mga alagad. (1 Ped. 3:12) Kita makaampo kanunay kaniya. Pagkadako sa pribilehiyo nga atong napahimuslan, nga makaampo “sa tanang higayon”!—Efe. 6:18.
4 “Mga Isigkamagbubuhat sa Diyos”: Ang usa sa atong kinamaayohang mga pribilehiyo mao ang pagmantala sa maayong balita sa Gingharian sa Diyos ingong “mga isigkamagbubuhat sa Diyos.” (1 Cor. 3:9) Kini maoy usa ka buluhaton nga makapatagbaw ug makapalagsik. (Juan 4:34) Si Jehova wala manginahanglan ug mga tawo aron mapalampos ang iyang buluhaton, apan iya kining gihatag kanato tungod kay siya nahigugma kanato. (Luc. 19:39, 40) Sa pagbuhat niana, wala ihatag ni Jehova kini nga pribilehiyo ngadto kang bisan kinsa na lamang. Kinahanglang makab-ot ug mamentinar niadtong makigbahin sa publikong ministeryo ang espirituwal nga mga kuwalipikasyon. (Isa. 52:11) Ato bang gipakita nga atong gipabilhan kining pribilehiyoa pinaagi sa paghimo sa ministeryo nga hinungdanong bahin sa atong senemanang mga kalihokan?
5 Ang mga pribilehiyo gikan kang Jehova makapalambo sa katuyoan sa atong kinabuhi. (Prov. 10:22) Mahala kini! Pinaagi sa pagpasundayag nga ato gayong gimahal ang atong mga pribilehiyo sa pag-alagad, atong mapahimut-an ang atong langitnong Amahan, ang Maghahatag sa “matag maayong gasa ug matag hingpit nga regalo.”—Sant. 1:17.