‘Sunda Pag-ayo ang Iyang mga Tunob’
1. Sa unsang paagi kita mahimong epektibong mga ministro?
1 Si Jesus wala makatungha sa eskuylahan sa mga Hudiyo, apan siya ang kinalabwang Ministro sa tibuok kasaysayan. Kita mapasalamaton nga ang ministeryo ni Jesus gisulat diha sa Bibliya aron kita makapahimulos niini. Aron mahimo kitang epektibong mga ministro, kinahanglang ‘sundon nato pag-ayo ang iyang mga tunob.’—1 Ped. 2:21.
2. Sa unsang paagi maugmad nato ang gugma sa mga tawo sama nianang kang Kristo?
2 Ipakita ang Imong Gugma sa mga Tawo: Si Jesus nahigugma ug nahangawa sa mga tawo. (Mar. 6:30-34) Diha sa atong teritoryo, daghan ang “anaa sa kasakitan” ug kinahanglang makakat-on sila sa kamatuoran. (Roma 8:22) Kon atong pamalandongon ang ilang makaluluoyng kahimtang ug kon unsa ka dako ang gugma ni Jehova kanila, kita matukmod gayod nga magmakugihon sa pagsangyaw. (2 Ped. 3:9) Dugang pa, ang mga tawo mas daling mosanong sa atong mensahe kon ilang makita nga kita nahigugma gayod kanila.
3. Unsang mga kahigayonan ang gipahimuslan ni Jesus aron makasangyaw sa uban?
3 Pahimusli ang Kahigayonan: Gipahimuslan ni Jesus ang mga kahigayonan sa pagpaambit sa maayong balita ngadto sa uban. (Mat. 4:23; 9:9; Juan 4:7-10) Sa susama, buot nato nga kanunayng andam sa pagpaambit sa kamatuoran diha sa atong adlaw-adlaw nga pagkinabuhi. Ang pipila magdala kanunay ug Bibliya ug mga literatura aron sila makasangyaw sa trabahoan, sa eskuylahan, samtang nagbiyahe o namalit, ug sa uban pang mga higayon.
4. Unsay atong himoon aron mapasiugda ang Gingharian diha sa atong pagsangyaw?
4 Ipasiugda ang Gingharian: Gipasiugda ni Jesus ang maayong balita sa Gingharian sa iyang pagsangyaw. (Luc. 4:43) Bisag dili dayon nato hisgotan ang Gingharian diha sa atong presentasyon, mangita kitag paagi nga masabtan sa tagbalay nga gikinahanglan gayod nato kini. Bisan pag maghisgot kita sa daotang kahimtang sa kataposang mga adlaw, angay natong hinumdoman nga ang atong pangunang mensahe mao ang “maayong balita sa maayong mga butang.”—Roma 10:15.
5. Sa unsang paagi makatabang ang Bibliya aron mahimo kitang epektibo sa ministeryo?
5 Salig sa Pulong sa Diyos: Si Jesus kanunayng naggamit sa Kasulatan diha sa iyang ministeryo. Wala siya magtudlo sa iyang kaugalingong ideya. (Juan 7:16, 18) Siya makugihong nagtuon sa Pulong sa Diyos ug naggamit niana sa dihang gitental siya ni Satanas. (Mat. 4:1-4) Aron magmaepektibo usab kita sa pagtudlo sa uban, kinahanglang atong basahon ang Bibliya adlaw-adlaw ug ipadapat kana. (Roma 2:21) Sa pagtubag sa mga pangutana sa mga tawo diha sa kanataran, kinahanglang mogamit kitag mga teksto sa Bibliya ug kon posible, basahon nato kana ngadto kanila. Buot nato nga makita sa tagbalay nga ang atong gitudlo naggikan sa Diyos, dili sa atong kaugalingon.
6. Unsay gibuhat ni Jesus aron maabot niya ang kasingkasing sa mga tawo?
6 Abta ang Kasingkasing sa Imong Pagpanudlo: “Wala pa gayoy laing tawo nga nakasulti ug sama niini.” (Juan 7:46) Mao kanay tubag sa mga sundalo bahin kang Jesus sa dihang gipangutana sila sa pangulong mga saserdote ug mga Pariseo kon nganong wala nila siya dakpa. Si Jesus nanudlo sa paagi nga natandog gayod ang kasingkasing sa iyang gitudloan. (Luc. 24:32) Siya naggamit ug mga ilustrasyon nga gipasukad sa adlaw-adlawng pagkinabuhi sa mga tawo aron mas masabtan nila ang iyang gitudlo. (Mat. 13:34) Wala niya han-oki ang iyang mamiminaw ug sobra ka daghang impormasyon. (Juan 16:12) Siya nanudlo usab sa paagi nga madayeg si Jehova, dili ang iyang kaugalingon. Sama kang Jesus, kita mahimong maayong magtutudlo pinaagi sa ‘pagtagad kanunay sa atong pagpanudlo.’—1 Tim. 4:16.
7. Nganong milahutay si Jesus sa ministeryo?
7 Lahutay Bisag Dili Mosanong ang mga Tawo: Si Jesus naghimog mga milagro, apan daghan ang wala mamati kaniya. (Luc. 10:13) Bisan ang mga paryente ni Jesus nagtuo nga “nalisoan siya sa iyang pangisip.” (Mar. 3:21) Bisan pa niana, si Jesus wala maluya. Gihuptan niya ang positibong tinamdan tungod kay siya kombinsido gayod nga siya nagtudlo sa kamatuoran nga maghatag ug kaayohan sa mga tawo. (Juan 8:32) Sa tabang ni Jehova, kita usab determinado nga molahutay.—2 Cor. 4:1.
8, 9. Sa unsang paagi masundog nato si Jesus sa paghimog mga sakripisyo alang sa ministeryo?
8 Pagsakripisyo Aron Bug-os Makapakig-ambit sa Ministeryo: Gisakripisyo ni Jesus ang materyal nga mga butang alang sa ministeryo. (Mat. 8:20) Siya kugihan kaayo, ug gani may mga higayon nga padayon siyang nagsangyaw bisag hapon na kaayo. (Mar. 6:35, 36) Si Jesus nahibalo nga limitado ang iyang panahon sa pagpalampos sa iyang buluhaton. Sanglit “ang panahong nabilin mubo na,” kinahanglan usab kitang mohimog mga pagsakripisyo sa paggamit sa atong panahon, kusog, ug mga kahinguhaan agig pagsundog kang Jesus.—1 Cor. 7:29-31.
9 Ang mga Kristohanon sa unang siglo maoy epektibong mga ministro tungod kay nakakat-on sila kang Jesus. (Buh. 4:13) Bug-os usab natong mapalampos ang atong ministeryo kon atong sundogon ang kinalabwang Ministro sa tibuok kasaysayan.—2 Tim. 4:5.