“Isangon Diha Kaninyo ang Akong Yugo”
1 Sa kalibotan nga punog mga kapit-os ug kabalaka, kita makakaplag ug tinuod nga kahupayan kon kita mosanong sa mainitong pagdapit ni Jesus nga isangon ang iyang yugo. (Mat. 11:29, 30) Ang pagdawat sa yugo sa pagkahimong tinun-an naglakip sa pagpakigbahin sa usa ka dili sayon apan makapahupay nga buluhaton. Kini mao ang pagsangyaw sa maayong balita sa Gingharian ug pagtabang sa uban nga makabaton ug kahupayan ilawom sa magaang yugo ni Jesus.—Mat. 24:14; 28:19, 20.
2 Kahupayan Diha sa Ministeryo: Si Jesus wala mag-awhag sa iyang mga sumusunod nga idugang nila sa ilang mga palas-anon ang iyang luwan. Hinunoa, siya nagdapit kanila nga isangon ang ilang mabug-at nga palas-anon ngadto kaniya ug pulihan kana sa iyang magaang luwan. Dili na kita mabug-atan pa sa mga kabalaka ug kawalay-paglaom niining sistemaha; ni mangagpas sa walay-kasegurohang mga bahandi. (Luc. 21:34; 1 Tim. 6:17) Bisan pag kita puliki ug kinahanglang motrabaho aron matagan-an ang atong adlaw-adlawng panginahanglan, ang pagsimba sa Diyos mao ang labing hinungdanon alang kanato. (Mat. 6:33) Ang pagsangyaw makapahupay ug dili makapabug-at kon huptan nato ang hustong panglantaw sa kon unsay labing hinungdanon.—Filip. 1:10.
3 Natural lang nga kita malipayng makighisgot bahin sa mga butang nga atong gipabilhan. (Luc. 6:45) Gimahal gayod sa mga Kristohanon si Jehova ug ang mga panalangin sa Gingharian nga iyang gisaad. Busa, makapahupay gayod ang pagpakighisgot bahin sa “maayong balita sa maayong mga butang” ug biyaan ang atong adlaw-adlawng mga kabalaka samtang makig-ambit diha sa pagsangyaw! (Roma 10:15) Tinuod, kon kanunay natong buhaton ang usa ka butang, mahimo kitang mas hanas niana ug makasinati kitag labawng kalipay. Busa ang paggahin ug daghang panahon sa pagsangyaw, kon kita makahimo, makahatag kanatog dugang kahupayan. Dako gayod ang atong kalipay sa dihang makaplagan nato ang mga tawong interesado! (Buh. 15:3) Lagmit makahibalag kitag mga tawong dili interesado o magsusupak, apan ang pagsangyaw makahatag kanatog espirituwal nga kahupayan kon kanunay kitang maghunahuna nga ang atong mga paningkamot nakapalipay kang Jehova, ug sa ngadtongadto ang iyang panalangin mopatunghag maayong mga resulta.—Buh. 5:41; 1 Cor. 3:9.
4 Pinaagi sa pagdawat sa pagdapit ni Jesus, malipay kita sa atong pribilehiyo nga moalagad uban kaniya ingong mga Saksi ni Jehova. (Isa. 43:10; Pin. 1:5) Wala nay mas labaw pa nga kahupayan kay niana!