Tudloi ang Uban sa Paghigugma Kang Jehova

1. Unsay nakapadani sa daghang tawo kang Jehova?

¹ Nahinumdom ka pa ba sa unang higayon nga nakadungog ka bahin kang Jehova? Unsay nakapadani kanimo ngadto kaniya? Daghang sinserong mga tawo ang nadani ngadto sa Diyos sa dihang ilang nakat-onan ang iyang maayo kaayo nga mga hiyas, ilabina ang iyang kamabination ug gugma.​—1 Juan 4:8.

2, 3. Sa unsang paagi atong magamit ang librong Gitudlo sa Bibliya aron motubo ang gugma sa mga estudyante sa Bibliya kang Jehova?

² “Kini mao ang Atong Diyos”: Ang librong Gitudlo sa Bibliya nagpasiugda sa gugma ni Jehova ug nga kita kinahanglang makigsuod kaniya. Sa unsang paagi atong magamit kining libroha sa pagtudlo sa uban aron motubo ang ilang gugma sa Diyos? Sa dihang maghisgot ug bag-ong punto, makasukna kitag mga pangutana nga makapahunahuna sa estudyante, sama sa: “Unsay gitudlo niini bahin kang Jehova?” o “Sa unsang paagi gipakita niini nga si Jehova mao gayod ang kinamaayohang Amahan?” Kon ingon niini ang atong pagpanudlo, ang estudyante masuod kang Jehova sa tibuok niyang kinabuhi.

³ Kon atong tabangan ang mga estudyante sa Bibliya nga makasabot nga dako gayong pribilehiyo ang pagkuhag kahibalo bahin sa bugtong matuod ug buhi nga Diyos, sila makasulti sama sa pulong ni Isaias, “kini mao ang atong Diyos.” (Isa. 25:9) Sa dihang atong isaysay ang Pulong sa Diyos, kinahanglan natong ipasiugda ang mga panalanginan nga mapahimuslan sa katawhan sa dihang matuman na ang katuyoan ni Jehova pinaagi sa iyang harianong kagamhanan nga gimandoan ni Kristo Jesus.​—Isa. 9:6, 7.

4, 5. Unsay kahulogan sa paghigugma kang Jehova?

⁴ Kon sa Unsang Paagi Ikapakita Nato ang Atong Gugma Kang Jehova: Kita nahibalo nga ang paghigugma kang Jehova sa bug-os kasingkasing, kalag, ug hunahuna naglangkit ug labaw pa kay sa atong pagbati sa Diyos. Kinahanglan kitang maghunahuna ug molihok uyon sa kabubut-on sa Diyos. (Sal. 97:10) Ikapakita nato ang atong gugma sa Diyos pinaagi sa pagsunod gayod sa iyang mga sugo ug sa padayong pagpakigbahin sa “balaang mga buhat sa panggawi ug mga buhat sa diyosnong pagkamahinalaron,” bisan atubangan sa mga pagsulay ug pagsupak.​—2 Ped. 3:11; 2 Juan 6.

⁵ Kita malipay sa pagbuhat sa kabubut-on sa Diyos tungod kay ato siyang gihigugma. (Sal. 40:8) Kinahanglang masabtan sa estudyante sa Bibliya nga ang tanang sugo sa Diyos maoy alang sa dumalayong kaayohan sa Iyang mga alagad. (Deut. 10:12, 13) Pinaagi sa pagpagiya kang Jehova, ikapakita sa usa ka tawo ang iyang lawom nga pagpabili sa kahibulongang mga buhat sa Diyos. Tabangi ang estudyante nga makasabot nga pinaagi sa paglakaw sa matarong nga dalan ni Jehova, siya makalikay sa daghang kasakit.

6. Unsang mga panalangin ang madawat sa usa sa paghigugma kang Jehova?

⁶ Panalanginan Kadtong Nahigugma sa Diyos: Si Jehova nahigugma gayod sa mapainubsanong mga tawo nga nahigugma kaniya, ug iyang ipadayag kanila ang “lawom nga mga butang sa Diyos.” (1 Cor. 2:9, 10) Ang maong kahibalo bahin sa katuyoan ni Jehova maghatag kanilag tin-aw nga panglantaw sa umaabot ug segurado nga paglaom. (Jer. 29:11) Kadtong nahigugma kang Jehova pakitaag talagsaong kalulot sa Diyos. (Ex. 20:6) Sila naglaom nga mabuhi sa walay kataposan tungod sa dakong gugma sa Diyos kanila.​—Juan 3:16.

7. Unsay imong gibati bahin sa pagtudlo sa uban sa paghigugma kang Jehova?

⁷ Kon atong pauswagon ang atong kahibalo bahin sa atong langitnong Amahan, mouswag usab ang atong kasibot sa pagpaambit niana sa uban. (Mat. 13:52) Pagkadakong pribilehiyo ang pagtudlo sa uban, ilabina sa atong mga anak, sa paghigugma kang Jehova! (Deut. 6:5-7) Hinaot nga kita, uban sa atong mga estudyante sa Bibliya, magpadayon sa pagdayeg sa Diyos samtang atong pahimuslan ang ‘dagayang pagkamaayo ni Jehova.’​—Sal. 145:7.