Ubos sa pagmando sa Diyos, ang tanang linalang nagkahiusa ug malinawon

Nganong Kinahanglan Nato ang Gingharian sa Diyos?

Sukad sa paglungtad sa unang mga tawo, ang atong Maglalalang, nga ang ngalan maoy Jehova, mao lang ang bugtong Magmamando. Siya nagmando sa mahigugmaong paagi. Naghimo siyag nindot nga puy-anan para sa mga tawo, ang hardin sa Eden. Nagtagana siyag daghang pagkaon para kanila. Ug gihatagan niyag makapalipay nga buluhaton ang mga tawo. (Genesis 1:28, 29; 2:8, 15) Malinawon gyod unta ang katawhan kon padayon silang nagpasakop sa mahigugmaong pagmando sa Diyos.

Si Adan naggunit sa gidiling bunga nga gihatag ni Eva. — Gisalikway ni Adan ug Eva ang Diyos ingong ilang Magmamando

Ang Bibliya nag-ingon nga usa ka rebelyosong anghel, nga sa ulahi gitawag ug Satanas nga Yawa, ang nagkuwestiyon sa katungod sa Diyos sa pagmando. Nangangkon siya nga ang mga tawo mas magmalipayon kon dili sila magpagiya ug magpasakop sa Diyos. Makapasubo, ang atong unang ginikanan, si Adan ug Eva, misunod kang Satanas ug mirebelde sa Diyos.—Genesis 3:1-6; Pinadayag 12:9.

Kay gisalikway ni Adan ug Eva ang Diyos ingong ilang Magmamando, gipahawa sila sa Paraiso ug nawala ang ilang paglaom nga mabuhi sa walay kataposan uban ang hingpit nga panglawas. (Genesis 3:17-19) Ang ilang desisyon nakaapektar sab sa ilang umaabot nga mga anak. Ang Bibliya nag-ingon nga tungod kay nakasala si Adan, “ang sala misulod sa kalibotan . . . ug ang kamatayon pinaagi sa sala.” (Roma 5:12) Ang sala mitultol ug laing makapasubong resulta: “Ang tawo nagmando sa tawo alang sa iyang ikadaot.” (Ecclesiastes 8:9) Sa laing pagkasulti, kon ang mga tawo magmando sa ilang kaugalingon, moresulta gyod kinig mga problema.

NAGSUGOD ANG PAGMANDO SA TAWO

Si Nimrod hambog kaayong nagtindog. Makita sa luyo ang mga tawo nga nagtukod ug torre. — Si Nimrod mirebelde kang Jehova

Ang unang tawo nga magmamando nga gihisgotan sa Bibliya mao si Nimrod. Ug siya mirebelde sa pagmando ni Jehova. Sukad sa panahon ni Nimrod, gigamit sa mga tawo ang ilang awtoridad sa sayop nga paagi. Mga 3,000 ka tuig kanhi, si Haring Solomon misulat: “Akong nakita ang mga luha sa mga dinaogdaog, ug walay mihupay kanila. Ug ang mga nagdaogdaog kanila dunay gahom.”—Ecclesiastes 4:1.

Kana gihapon ang kahimtang karon. Sa 2009, ang usa ka publikasyon sa United Nations miingon nga ang daotang pagmando mao ang “usa sa mga hinungdan sa tanang pagkadaotan sa kalibotan.”

PANAHON NA NGA MOLIHOK!

Ang kalibotan nagkinahanglan ug mas maayong mga magmamando ug mas maayong gobyerno. Ug kanay gisaad sa atong Maglalalang!

Collage: Mga resulta sa pagmando sa tawo. 1. Asian nga inahan nagkugos sa iyang naghilak nga anak diha sa hugaw nga dalan. 2. Nagsakit nga tigulang naghigda sa hospital bed. 3. Mga sundalo nagpinusilay sa gubat. 4. Suko kaayo nga mga tigprotesta naninggit ug naggunit ug mga banner. 5. Inahan ug iyang anak nagtindog sa gawas sa ilang pultahan nga buak ang samin. 6. Siyudad nga nalukop sa asò ug mga kable. — Bisan ang pinakamaayong gobyerno sa tawo wala makasulbad sa dagkong problema sa katawhan

Ang Diyos nagtukod ug Gingharian, o gobyerno, nga mopuli sa tanang gobyerno sa tawo ug “kini ray mobarog hangtod sa hangtod.” (Daniel 2:44) Kini nga Gingharian ang ginaampo sa minilyong tawo. (Mateo 6:9, 10) Pero dili ang Diyos ang magmando niini nga gobyerno. Hinuon, gitudlo niya ingong Magmamando ang usa nga nabuhi kaniadto ingong tawo. Kinsa ang maong pinili sa Diyos?