Suportahi Karon ang Gingharian sa Diyos!
Imadyina nga naay moabotay nga kusog kaayong bagyo sa inyong lugar. Ang mga ahensiya sa gobyerno nagpahibalo: “BALHIN MO! PANGITAG LUWAS NGA LUGAR!” Unsa ang maalamon nimong buhaton? Seguradong moadto ka sa luwas nga lugar.
Kita karon samag nagkinabuhi sa panahon nga naay moabotay nga kusog kaayong “bagyo.” Gitawag kini ni Jesus nga “dakong kasakitan.” (Mateo 24:21) Kini nga kasakitan mahitabo gayod ug dili nato kini malikayan. Pero naa tay mahimo aron maprotektahan ang atong kaugalingon. Unsa kana?
Sa iyang Wali sa Bukid, si Jesu-Kristo naghatag ug direksiyon: “Unaha kanunay ang pagpangita sa Gingharian [sa Diyos] ug sa pagkamatarong sa Diyos.” (Mateo 6:33) Unsaon nato kana paghimo?
Unaha pagpangita ang Gingharian sa Diyos. Nagpasabot kini nga isipon nato ang Gingharian sa Diyos ingong pinakaimportante kay sa bisan unsang butang. (Mateo 6:25, 32, 33) Ngano? Kay walay tawo nga makasulbad sa tanang problema sa katawhan. Ang Gingharian sa Diyos lang ang makahimo nianang lisod nga buluhaton.
Pangitaa ang iyang pagkamatarong. Angay tang maningkamot pag-ayo nga magkinabuhi uyon sa matarong nga mga balaod ug prinsipyo sa Diyos. Ngano? Kay kon mohimo tag kaugalingong sukdanan sa kon unsay maayo ug daotan, moresulta lang kinig kadaot. (Proverbio 16:25) Sa laing bahin, kon magkinabuhi ta uyon sa mga sukdanan sa Diyos, dili lang nato mapalipay ang Diyos kondili makabenepisyo pod ta.—Isaias 48:17, 18.
Kanunayng unaha ang pagpangita sa Gingharian sa Diyos ug sa iyang pagkamatarong. Nagpasidaan si Jesus nga basin ang pipila malinga ug maghunahuna nga makahatag kanilag seguridad ang pagpangitag daghang kuwarta. Ang uban tingali puliki kaayo sa pag-atiman sa ilang kaugalingon ug sa ilang pamilya maong wala na silay panahon sa pagpangita sa Gingharian sa Diyos.—Mateo 6:19-21, 25-32.
Hinuon, si Jesus nagsaad nga kadtong misuportar sa Gingharian sa Diyos makabaton sa ilang panginahanglan karon ug makapahimulos sa walay kataposang mga panalangin sa umaabot.—Mateo 6:33.
Bisan tuod giuna sa mga tinun-an ni Jesus sa unang siglo ang pagpangita sa Gingharian sa Diyos ug sa iyang pagkamatarong, wala nila makita nga nawala ang tanang kasakit ug pag-antos. Pero naprotektahan sila. Sa unsang paagi?
Sila nagkinabuhi uyon sa matarong nga mga sukdanan sa Diyos, ug tungod niana sila naprotektahan gikan sa mga kalisdanan nga giantos niadtong wala magsunod sa mga sugo sa Diyos. Ang ilang lig-ong pagtuo nga moabot ang Gingharian nakatabang nila nga maatubang bisan ang grabeng mga problema. Ug gihatagan sila sa Diyos ug “gahom nga labaw sa kasarangan” aron sila makalahutay.—2 Corinto 4:7-9.
UNAHON BA NIMO PAGPANGITA ANG GINGHARIAN?
Ang mga Kristohanon sa unang siglo misunod sa sugo ni Jesus nga unahon pagpangita ang Gingharian. Ilang gisangyaw ang maayong balita sa Gingharian ngadto sa lainlaing lugar. (Colosas 1:23) Naa pod bay naghimo niana karon?
Oo! Ang mga Saksi ni Jehova nahibalo nga mubo na lang ang nabilin nga panahon sa dili pa laglagon sa Gingharian sa Diyos kining daotang sistema sa kalibotan. Busa gihimo nila ang ilang maarangan sa pagtuman sa giingon ni Jesus: “Kining maayong balita sa Gingharian isangyaw sa tibuok yuta sa pagpamatuod ngadto sa tanang kanasoran, ug unya moabot ang kataposan.”—Mateo 24:14.
Unsay imong sanong sa maayong balita? Gidasig ka namo nga sundogon ang gihimo sa mga taga-Berea sa Macedonia sa unang siglo. Dihang nadungog nila ang maayong balita bahin sa Gingharian gikan kang apostol Pablo, “maikagon” nilang gidawat ang iyang mensahe. Dayon ilang ‘gisusi pag-ayo ang Balaang Kasulatan’ kon tinuod ba ang ilang nadungog, ug ilang gipadapat ang ilang nakat-onan.—Buhat 17:11, 12.
Mahimo pod nâ nimo. Kon imong unahon pagpangita ang Gingharian sa Diyos ug ang iyang pagkamatarong, ikaw makabaton ug proteksiyon karon ug mapahimuslan nimo ang walay kataposang kalinaw ug kasegurohan sa umaabot.