Ang Pagsangyaw Makapalig-on sa Atong Espirituwalidad
1. Unsang kaayohan ang atong mabatonan sa pagsangyaw nga buluhaton?
1 Ang atong aktibong pagpakigbahin sa buluhatong pagsangyaw makapalig-on sa atong relasyon kang Jehova ug makahatag kanatog dugang kalipay. Siyempre, ato kining gihimo aron pahimut-an si Jehova. Dugang pa, pinaagi sa pagsunod sa sugo nga “iwali ang pulong,” atong madawat ang mga panalangin ni Jehova ug makatabang usab kini kanato sa uban pang mga paagi. (2 Tim. 4:2; Isa. 48:17, 18) Sa unsang paagi ang pagsangyaw makapalig-on ug makapalipay kanato?
2. Sa unsang mga paagi ang pagsangyaw makapalig-on kanato?
2 Kita Gipalig-on ug Gipanalanginan: Ang pagsangyaw magdasig kanato nga isentro ang atong pagtagad sa mga panalangin sa Gingharian inay sa mga problema nga atong nasinatian karon. (2 Cor. 4:18) Ang pagpaambit sa mga pagtulon-an sa Bibliya makapalig-on sa atong pagtuo sa mga saad ni Jehova ug sa atong pagpabili sa kamatuoran. (Isa. 65:13, 14) Samtang atong tabangan ang uban nga makabaton ug maayong relasyon kang Jehova ug mahimong “dili bahin sa kalibotan,” kita usab mapalig-on nga magpabiling bulag sa kalibotan.—Juan 17:14, 16; Roma 12:2.
3. Sa unsang paagi ang pagsangyaw makatabang kanato nga maugmad ang Kristohanong mga hiyas?
3 Ang pagsangyaw makatabang kanato nga maugmad ang Kristohanong mga hiyas. Pananglitan, kon maningkamot kita sa pagtabang sa tanang matang sa mga tawo, kini makatabang kanato nga maugmad ang pagkamapaubsanon. (1 Cor. 9:19-23) Samtang atong sangyawan ang mga tawo nga daw “pinanitan ug nagkatibuagsa sama sa mga karnero nga walay magbalantay,” kita makakat-on sa pagpakitag simpatiya ug empatiya. (Mat. 9:36) Atong maugmad ang pagkamalahutayon kon mopadayon kita sa pagsangyaw bisan pa sa mga pagsupak o kawalay-interes sa mga tawo. Bation gayod nato ang dakong kalipay kon maningkamot kita sa pagtabang sa uban.—Buh. 20:35.
4. Unsay pagbati nimo sa imong ministeryo?
4 Ang pagsangyaw maoy usa ka kahigayonan nga madayeg ang Usa nga takos sa atong pagsimba. Dako gayod kini nga panalangin! Kini makapalig-on kanato. Maghatag kinig dagayang panalangin niadtong ‘bug-os nagpamatuod sa maayong balita.’—Buh. 20:24.