Pangutana

◼ Angay bang gamiton sa mga kongregasyon o sa mga indibiduwal ang mga logo sa legal nga mga korporasyon nga gigamit sa mga Saksi ni Jehova?

Ang usa ka logo maoy ngalan, simbolo, o ilhanan nga gidisenyo aron dali rang mailhan ang usa ka butang o organisasyon. Ang logo nga torre mao ang naghawas sa Watch Tower Bible and Tract Society of Pennsylvania ug sa uban pang korporasyon nga gigamit sa organisasyon. Gigamit sa Kristohanong Kongregasyon sa mga Saksi ni Jehova ang abli nga Bibliya ingong logo diha sa opisyal nga mga sulat niini. Ang ubang mga korporasyon sa mga Saksi ni Jehova naggamit ug lainlaing logo.

Dili angayng gamiton sa mga kongregasyon o sa mga indibiduwal ang mga logo o ngalan sa legal nga mga korporasyon sa organisasyon, o halos susama niana nga mga logo ug ngalan, diha sa ilang mga Kingdom Hall, mga signboard sa Kingdom Hall, mga sulat, personal nga mga butang, ug uban pa. Ang maong paggamit sa mga logo sa organisasyon basin makapalibog sa mga opisyales sa gobyerno, mga magmamantala, ug sa uban pa mahitungod sa legal nga koneksiyon sa kongregasyon ug sa legal nga mga korporasyon sa organisasyon. Sa samang paagi, ang dili opisyal nga mga sulat basin masaypan nga naggikan sa tibuok-kalibotang hedkuwarter o sa sangang buhatan.

Ang logo nga torre, o mga logo nga halos susama niini, dili angayng gamiton diha sa umaabot nga mga proyekto sa Kingdom Hall bisan pag kini gipanag-iya sa usa ka korporasyon sa Watch Tower. Ang mga kongregasyon nga naggamit ug logo diha sa ilang Kingdom Hall dili kinahanglang magtangtang dayon niini, kay basin nagkinahanglan kinig dakong kausaban, panahon, paningkamot, ug galastohan. Hinunoa, kon dili ra kaayo dako ang ayohonon o trabaho, ang mga logo angayng tangtangon. Kon nagkinahanglan kinig dakong kausaban, ang mga logo tangtangon sa panahon nga i-renovate ang Kingdom Hall o bag-ohon ang signboard.