Unsaon Nimo Pagtubag?
1. Nganong angay natong sundogon ang panig-ingnan ni Jesus sa dihang adunay mangutana kanato?
1 Hangtod karon, ang mga tawo nakadayeg gayod kang Jesus tungod sa iyang epektibong pagtubag sa mga pangutana nga gisukna kaniya. Sa dihang kita makaatubang ug lainlaing pangutana diha sa ministeryo, angay natong sundogon ang paagi ni Jesus sa pagtubag.—1 Ped. 2:21.
2. Unsay makatabang kanato aron makahatag ug epektibong tubag sa usa ka pangutana?
2 Paminaw Una: Gikonsiderar ni Jesus ang panghunahuna sa usa nga nangutana. May mga higayon nga kinahanglan kitang mosukna ug mga pangutana aron matino kon unsa gayod ang buot ipasabot sa nangutana. Ang usa nga mangutana, “Nagtuo ka ba kang Jesus?” lagmit buot lang masayod kon nganong dili ka magsaulog ug Pasko. Kon imong masabtan ang tinuod nga motibo sa nangutana, makapangatarongan ka kaniya sa mas epektibong paagi.—Luc. 10:25-37.
3. Unsay makatabang kanato sa pagkaplag ug makapatagbawng mga tubag gikan sa Kasulatan?
3 Tubaga Pinaagi sa Pulong sa Diyos: Kasagaran labing maayo nga gamiton ang Bibliya sa pagtubag sa mga pangutana. (2 Tim. 3:16, 17; Heb. 4:12) Ang librong Nangatarongan ug ang “Mga Ulohan sa Bibliya nga Pagahisgotan” diha sa Bag-ong Kalibotang Hubad sa Balaang Kasulatan makatabang gayod sa paghatag ug hustong tubag. Bisan pag ang nangutana dili motuo ug Bibliya, mahimo gihapon nimong ipaambit kaniya sa mataktikanhong paagi ang gitudlo sa Kasulatan. Dasiga siya nga pamalandongon ang praktikal nga kaalam nga makaplagan diha sa Bibliya. Pinaagi sa pagsundog kang Jesus, ang imong mga tubag mahimong “sama sa mansanas nga bulawan diha sa linilok nga plata”—dalayegon, maayo, ug mapuslanon.—Prov. 25:11.
4. Sa unsang mga higayon nga labing maayo nga dili nato tubagon ang matag pangutana?
4 Angay ba Natong Tubagon ang Tanang Pangutana? Kon wala ka mahibalo sa tubag sa usa ka pangutana, ayawg kaulaw sa pag-ingon: “Wala ako mahibalo sa tubag, apan mahimo kong manukiduki sa imong pangutana ug mobalik aron tubagon kana.” Ang maong pagkamapaubsanon ug personal nga interes lagmit mopalihok sa tagbalay sa pagdapit kanimo nga mobalik. Kon imong masabtan nga ang pangutana naggikan sa mga magsusupak nga gusto lang makiglantugi, sundoga si Jesus pinaagi sa paglimite sa imong tubag. (Luc. 20:1-8) Sa samang paagi, kon makigdebate kanimo ang usa nga walay tiunayng interes sa kamatuoran, putla sa matinahorong paagi ang panaghisgot ug gamita ang imong panahon alang sa pagpangita sa mga tawong sinsero.—Mat. 7:6.
5. Unsang panig-ingnan ang gihatag ni Jesus maylabot sa pagtubag sa mga pangutana?
5 Nahibalo si Jesus nga kinahanglan gayod siyang mosalig kang Jehova sa pagtuman sa iyang buluhaton nga “magpamatuod sa kamatuoran,” nga naglakip sa pagtubag sa sinserong mga pangutana. (Juan 18:37) Pagkadakong pribilehiyo nga atong masundog si Jesus sa paghatag ug tubag niadtong “hustong nakiling alang sa kinabuhing walay kataposan”!—Buh. 13:48.