Magwali nga Dinalian!
1. Unsang tambag ni Pablo ang angayng tagdon sa atong adlaw?
1 “Iwali ang pulong, magmadali diha niini.” (2 Tim. 4:2) Nganong ang tambag ni Pablo hinungdanon kaayo sa atong adlaw? Sa unsang paagi kining mga pulonga makaapektar sa atong kinabuhi ug nianang sa uban?
2. Nganong makugihon natong pangitaon kadtong wala makadungog sa maayong balita?
2 Nalangkit ang mga Kinabuhi: Minilyong tawo sa tibuok kalibotan ang kinahanglan pang makadungog sa maayong balita nga mahimong makahatag kanilag kaluwasan. (Roma 10:13-15; 1 Tim. 4:16) Daghang matinud-anog kasingkasing ang makaplagan diha sa teritoryong kanunayng gisangyawan. Kon moduaw ta sa laing adlaw o sa lahi nga oras, lagmit makaplagan nato ang laing tawo. Ang maong pagkamakugihon maghatag kanatog hinlo nga tanlag ug magpahigawas kanato sa pagkasad-an sa dugo.—Buh. 20:26.
3. Unsaon nato paggamit nga maalamon ang atong panahon diha sa ministeryo?
3 Bisag nakasinatig mapintas nga pagsupak, ang unang-siglong mga Kristohanon ‘nagpuno sa Jerusalem sa ilang pagtulon-an.’ (Buh. 5:28) Kita ba usab determinado nga “maghatag ug bug-os nga pamatuod”? (Buh. 10:42) Kon kita anaa sa ministeryo, gigamit ba natong maalamon ang atong panahon? Kon kita namalaybalay, ug sa pipila ka hinungdan kinahanglan natong hulaton ang uban, kita ba nagpakitag inisyatibo sa pagsangyaw sa mga lumalabay?
4. Sa unsang paagi ang atong pagsangyaw nga dinalian makatabang kanato nga magpabiling magbantay?
4 Makadugang sa Atong Pagkamabinantayon: Sanglit duol na ang kataposan niining sistemaha sa mga butang, kinahanglan kitang magpabiling mabinantayon. (1 Tes. 5:1-6) Kon kita kanunayng magpaambit sa atong paglaom sa Gingharian, dili kita mabug-atan niining sistemaha sa mga butang. (Luc. 21:34-36) Hinunoa, samtang kita “nagabutang kanunay sa hunahuna” sa adlaw ni Jehova, madasig kita nga mas pang magmasiboton sa pagpakig-ambit sa makaluwas-ug-kinabuhi nga buluhatong pagsangyaw.—2 Ped. 3:11, 12.
5. Kon kita adunay pagtahod sa kinabuhi, unsay atong paningkamotang buhaton diha sa ministeryo?
5 Kon kita magsangyaw nga dinalian, atong gihuptan ang samang panglantaw ni Jehova bahin sa kinabuhi: “Siya wala magtinguha nga adunay malaglag apan nagtinguha nga ang tanan makakab-ot sa paghinulsol.” (2 Ped. 3:9; Ezeq. 33:11) Hinaot nga determinado kita sa pagkaplag ug daghan pang mga tawo sa atong teritoryo, kutob sa mahimo, alang sa kadayeganan ni Jehova!—Sal. 109:30.