‘Kining Maayong Balita Igawali’!
1. Nganong nahibalo kita nga wala gayoy makapugong sa buluhatong pagwali?
1 Wala gayoy makapugong kang Jehova sa pagtuman sa iyang kabubut-on. (Isa. 14:24) Bisan pag daw imposible nga makadaog si Maghuhukom Gideon ug ang iyang 300 ka tawo batok sa 135,000 ka Midianhong kasundalohan, siya giingnan ni Jehova: “Ikaw magluwas gayod sa Israel gikan sa kamot sa Midian. Wala ba ako magpadala kanimo?” (Maghu. 6:14) Unsang buluhatona ang gisuportahan karon ni Jehova? Si Jesus miingon: “Kining maayong balita sa gingharian igawali sa tibuok gipuy-ang yuta.” (Mat. 24:14) Wala gayoy makapugong niining buluhatona!
2. Nganong makadahom kitang si Jehova motabang sa matag usa kanato diha sa ministeryo?
2 Si Jehova Motabang sa Matag Usa Kanato: Bisan tuod makasalig kita nga palamposon ni Jehova ang iyang mga Saksi ingong usa ka grupo, makadahom ba kitang motabang siya sa matag usa kanato? Sa panahon sa kalisod, si apostol Pablo mibati nga gitabangan siya ni Jehova pinaagi sa iyang Anak, si Jesus. (2 Tim. 4:17) Makasalig usab kita nga panalanginan ni Jehova ang paningkamot sa matag usa sa pagtuman sa Iyang kabubut-on.—1 Juan 5:14.
3. Sa unsang mga kahimtang nga si Jehova motabang kanato?
3 Tungod kay puliki kaayo sa matag adlaw, mibati ka ba nga wala nay kusog alang sa ministeryo? “Siya naghatag ug gahom sa gikapoy.” (Isa. 40:29-31) Ikaw ba gilutos o gisupak? “Itugyan ang imong palas-anon kang Jehova, ug siya magasapnay kanimo.” (Sal. 55:22) Mawad-an ka ba usahay ug kompiyansa sa kaugalingon? “Lakaw, ug ako magauban sa imong baba.” (Ex. 4:11, 12) Duna ka bay mga balatian mao nga dili ka na kaayo makasangyaw? Gipabilhan ug gidawat ni Jehova ang imong tibuok-kalag nga paningkamot, bisag unsa ka gamay.—1 Cor. 3:6, 9.
4. Unsay epekto kanato kon kita mosalig kang Jehova?
4 Ang kamot ni Jehova “gituy-od, ug kinsay makapahuyhoy niini?” (Isa. 14:27) Tungod kay kita misalig nga panalanginan ni Jehova ang atong ministeryo, hinaot nga dili kita mohunong sa pagwali “uban ang kaisog pinaagi sa awtoridad ni Jehova.”—Buh. 14:3.