Kinahanglang Mag-ampo ang Kristohanong mga Ministro
1. Unsay gikinahanglan sa pagtuman sa atong ministeryo?
1 Dili kita makatuman sa ministeryo sa ato rang kaugalingon. Si Jehova mohatag kanatog kusog sa pagbuhat niana. (Filip. 4:13) Iyang gamiton ang mga manulonda aron tabangan kita sa pagkaplag sa karnerohong mga tawo. (Pin. 14:6, 7) Si Jehova magpatubo sa mga binhi sa kamatuoran nga atong gitanom ug gibisbisan. (1 Cor. 3:6, 9) Pagkahinungdanon nga ang Kristohanong mga ministro mosalig sa atong langitnong Amahan pinaagig pag-ampo!
2. Unsa ang pipila ka butang nga atong iampo?
2 Alang sa Kaugalingon: Kinahanglang mag-ampo kita sa matag higayon nga kita mosangyaw. (Efe. 6:18) Unsay atong iampo? Makaampo kita aron magmaisogon ug magmapositibo bahin sa atong teritoryo. (Buh. 4:29) Makahangyo kita kang Jehova nga giyahan ngadto sa mga tawong matarong ug kasingkasing nga madumalahag pagtuon sa Bibliya. Kon may pangutana ang tagbalay, kita sa hilom makaampog mubo kang Jehova aron makatubag sa hustong paagi. (Neh. 2:4) Makapangayo usab kitag kaalam aron mauna gayod nato ang ministeryo. (Sant. 1:5) Lain pa, si Jehova malipay kon kita magpasalamat usab sa atong pribilehiyo ingong iyang mga ministro.—Col. 3:15.
3. Sa unsang paagi ang pag-ampo alang sa uban makapauswag sa buluhatong pagsangyaw?
3 Alang sa Uban: Angay usab kitang ‘mag-ampo alang sa usag usa,’ ug ilakip ang ngalan sa mga isigkaministro kon kana nahiangay. (Sant. 5:16; Buh. 12:5) Limitado ba ang imong mahimo sa pagsangyaw tungod sa balatian? Nan iampo ang mga isigkaministro nga maayog panglawas. Ayaw gayod pakamenosa ang mahimo sa imong mga pag-ampo alang kanila! Angayng iampo usab ang mga awtoridad nga padayong motugot sa buluhatong pagsangyaw ug nga ang atong mga igsoon “magpadayon sa pagkinabuhi nga mahusay ug malinawon.”—1 Tim. 2:1, 2.
4. Nganong angay kitang molahutay sa pag-ampo?
4 Ang pagpahayag sa maayong balita sa tibuok yuta maoy dako kaayong buluhaton. Apan, kon kita ‘molahutay sa pag-ampo,’ makatuman kita niini sa tabang ni Jehova.—Roma 12:12.