Igo na ba ang Akong Nahimo?

1. Unsay gikabalak-an tingali sa usa ka matinumanong Kristohanon?

¹ Nakapangutana ka na ba niini sa imong kaugalingon? Tingali mikunhod ang imong panahon nga nagugol sa ministeryo tungod sa imong pagkatigulang, mga balatian, o daghang responsibilidad sa pamilya, nga tungod niini mibati kag kaluya. Usa ka sister nga may tulo ka anak misulat nga usahay siya makonsensiya kay nalimitahan ang iyang panahon sa pagministeryo tungod sa pag-atiman niya sa iyang pamilya. Unsay makatabang kanato aron makabatog timbang nga panglantaw niining mga butanga?

2. Unsay gidahom ni Jehova kanato?

² Kon Unsay Gidahom ni Jehova Kanato: Sa walay duhaduha, kitang tanan buot gayod mohimo ug dugang pa diha sa ministeryo. Apan sagad dunay dakong kalainan kon unsay buot natong buhaton ug kon unsay atong realistikong mabuhat. Ang atong tinguha nga mohimo ug dugang pa diha sa ministeryo nagpakita nga kita dili mapinasagdanon. Angay natong hinumdoman nga si Jehova nahibalo gayod sa atong mga limitasyon ug wala mangayo ug labaw pa kay sa atong maarangan. (Sal. 103:13, 14) Unsay iyang gidahom kanato? Buot niyang kita moalagad kaniya sa tibuok-kalag ug ihatag kaniya ang labing maayo.—Col. 3:23.

3. Sa unsang paagi nato matino nga realistiko ang atong mga paningkamot diha sa ministeryo?

³ Unsay makatabang kanato aron matino kon unsay realistiko natong mabuhat? Makapangayo kita kang Jehova ug tabang maylabot niini. (Sal. 26:2) Mahimong makatabang usab kanato ang usa ka kasaligan, hamtong nga Kristohanong higala nga nakaila kaayo kanato ug dili mahadlok nga motambag kon unsay kinahanglan natong pauswagon. (Prov. 27:9) Hinumdomi usab nga mabag-o ang mga sirkumstansiya sa atong kinabuhi, busa hinungdanon nga susihon nato kanunay ang atong kahimtang.—Efe. 5:10.

4. Unsaon nato paglantaw ang pinasukad-sa-Bibliya nga mga pahinumdom maylabot sa atong ministeryo?

⁴ Kon Unsaon Paglantaw ang mga Pahinumdom: Panahon sa usa ka lumba, ang mga tumatan-aw sagad mosinggit sa pag-abiba. Ang tuyo niini maoy aron dasigon ang mga maglulumba nga makaabot sa dag-anan, dili kay aron paluyahon sila. Sa samang paagi, ang pinasukad-sa-Bibliya nga mga pagdasig ug mga pahimangno diha sa atong panagkatigom ug sa atong mga publikasyon nga ‘dinaliang iwali ang pulong’ maoy alang sa atong kaayohan ug dili aron ipakita nga kulang ang atong mga paningkamot. (2 Tim. 4:2) Makasalig kita nga kon padayon kitang maningkamot sa pagbuhat kutob sa atong mahimo, hinumdoman ni Jehova ang atong ‘gugma ug mga buhat.’—Heb. 6:10.