“Ayaw Kahadlok”
1. Sama kang Jeremias, unsang mga kalisdanan ang atong maatubang?
1 Sa dihang gitudlo si Jeremias ingong manalagna, mibati siya nga dili takos. Apan gipasaligan siya ni Jehova, “ayaw kahadlok,” ug maluloton siyang gilig-on sa pagtuman sa iyang buluhaton. (Jer. 1:6-10) Sa atong panahon, ang kaulaw o kakulag kompiyansa makaapektar sa atong pagpakigbahin sa ministeryo. Usahay, dili kita mosangyaw kay nahadlok kon unsa unyay reaksiyon sa mga tawo o kon unsay ilang paglantaw kanato. Unsaon nato kini pagbuntog, ug unsang mga panalangin ang atong matagamtam?
2. Sa unsang paagi ang pagpangandam makatabang kanato sa pagbuntog sa kahadlok diha sa kanataran?
2 Pangandam Daan: Ang pagpangandam daan makatabang kanato sa pagbuntog sa kahadlok. Pananglitan, kon mangandam kita daan kon unsaon pagtubag ang kasagarang mga pagtutol, dili na kita malisdan. (Prov. 15:28) Mahimong gamiton ang Pamilyahanong Pagsimba sa pagpraktis kon unsaon pagtubag ang mga pagtutol diha sa tunghaan ug sa kanataran.—1 Ped. 3:15.
3. Sa unsang paagi ang pagsalig kang Jehova makatabang kanato sa pagbuntog sa kahadlok?
3 Salig Kang Jehova: Mabuntog nato ang kahadlok kon kita mosalig kang Jehova kay siya nagpasalig nga motabang kanato. (Isa. 41:10-13) Dili ba makahatag kana kanatog dakong kompiyansa? Dugang pa, gipasaligan kita ni Jesus nga kon dunay mga situwasyon nga wala nato damha, ang balaang espiritu sa Diyos motabang kanato sa paghatag ug maayong pamatuod. (Mar. 13:11) Busa moampo kita kanunay kang Jehova alang sa iyang balaang espiritu.—Luc. 11:13.
4. Unsang mga panalangin ang atong matagamtam kon padayon kitang mosangyaw bisan pa sa mga kalisdanan?
4 Mga Panalangin: Kon magpadayon kita sa pagsangyaw bisan pa sa mga kalisdanan, kita mapalig-on sa pag-atubang sa umaabot nga mga pagsulay. Kita makabatog kaisog, nga maoy timailhan niadtong gigiyahan sa balaang espiritu. (Buh. 4:31) Dugang pa, kon atong mabuntog ang atong kahadlok pinaagi sa tabang ni Jehova, molig-on ang atong pagtuo ug pagsalig kaniya. (Isa. 33:2) Kita magmalipayon ug mobatig katagbawan kay kita nakapahimuot sa atong langitnong Amahan. (1 Ped. 4:13, 14) Nan, ayawg kahadlok sa pagsangyaw sa mensahe sa Gingharian, nga masaligon kanunay sa tabang ni Jehova!