Ang Kaumahan Anihonon Na
1. Unsang hinungdanong buluhaton ang ginahimo karon?
1 Human masangyawi ang babayeng Samarianhon, giingnan ni Jesus ang iyang mga tinun-an: “Iyahat ang inyong mga mata ug lantawa ang kaumahan, nga kini puti na aron anihon.” (Juan 4:35, 36) Nakita ni Jesus nga ang espirituwal nga pagpangani pagahimoon sa tibuok kalibotan. Bisag atua siya sa langit, si Jesus nalangkit gihapon sa pagpangani. (Mat. 28:19, 20) Unsay mga timailhan nga kining buluhatona mouswag pa gayod samtang hapit na kining matapos?
2. Unsay pamatuod nga nag-uswag ang pagpangani sa tibuok kalibotan?
2 Tibuok Kalibotang Pagpangani:Sa 2009 nga tuig sa pag-alagad, dunay 3.2 porsiyentong pag-uswag sa mga magmamantala sa tibuok kalibotan, ug sa mga nasod diin gidili ang pagsangyaw, dunay 14 porsiyento nga pag-uswag. Ang gitahong mga pagtuon sa Bibliya matag bulan mikapig 7,619,000—nga mas daghan kay sa kinatas-ang ihap sa mga magmamantala ug labaw kinig halos tunga sa milyon sa gitahong mga pagtuon sa Bibliya sa miaging tuig. Samtang kusog nga nag-uswag ang buluhaton diha sa daghang dapit, dako usab ang panginahanglan alang sa mga misyonaryo nga nabansay sa Gilead. Nagmabungahon usab ang pagsangyaw diha sa langyaw ug pinulongan nga teritoryo sa daghang nasod. Dayag nga si Jehova nagpadali sa buluhaton niining hinapos nga yugto sa pagpangani. (Isa. 60:22) Positibo ka bag tinamdan sa imong teritoryo?
3. Unsay giingon sa uban bahin sa ilang teritoryo?
3 Ang Imong Teritoryo: Ang uban tingali moingon: “Ang akong teritoryo dili mabungahon.” Tinuod morag dili na mabungahon ang ubang mga teritoryo kon itandi sa uban o kaniadto. Busa moingon ang ubang mga igsoon nga natapos na ang pagpangani sa maong mga dapit ug nanghagdaw na lang sila. Tinuod ba kini?
4. Unsay angay natong tinamdan sa ministeryo, ug ngano?
4 Ang pagpangani maoy puliki nga kalihokan sukad sa sinugdanan hangtod sa kataposan. Matikdi ang pagkadinalian sa giingon ni Jesus: “Dako ang alanihon, apan diyutay ra ang mga mamumuo. Busa, pangamuyo kamo sa Agalon sa pagpangani nga magpadalag mga mamumuo ngadto sa iyang pagpangani.” (Mat. 9:37, 38) Si Jehova, ang Agalon sa pagpangani, maoy magtino kon kanus-a ug kon asa himoon ang pagpangani. (Juan 6:44; 1 Cor. 3:6-8) Unsay atong buluhaton? Ang Bibliya nagtubag: “Sa buntag ipugas ang imong binhi ug hangtod sa gabii ayaw papahulaya ang imong kamot.” (Eccl. 11:4-6) Sanglit hapit nang matapos ang pagpangani, dili kita angayng magrelaks-relaks!
5. Nganong angay gihapon natong sangyawan ang mga teritoryo nga daw dili mabungahon?
5 Padayon sa Pagpangani: Bisan kanunay na natong gikobrehan ang atong teritoryo ug daw wala nay mosanong, adunay maayong rason nga kita mosangyaw nga madasigon ug mobatig pagkadinalian. (2 Tim. 4:2) Tungod sa dagkong panghitabo sa kalibotan, mausab ang tinamdan sa mga tawo ug sila mabalak-on na sa umaabot. Samtang ang mga batan-on magkahamtong, buot nilang makabatog kasegurohan ug kalinaw sa hunahuna. Busa madani ang uban tungod sa atong pagsigeg sangyaw. Basig modawat na ang mga dili matinagdanon kaniadto. Bisan kadtong dili gayod maminaw sa atong mensahe kinahanglang mapasidan-an.—Ezeq. 2:4, 5; 3:19.
6. Kon dili mabungahon ang atong teritoryo, unsay makatabang nato nga magmadasigon kanunay?
6 Kon dili mabungahon ang atong teritoryo, unsay makatabang nato nga magpabiling madasigon? Mahimo natong sulayan ang ubang paagi sa ministeryo, sama sa pagsangyaw diha sa mga negosyohanan o pinaagig telepono. O kaha mogamit kitag bag-ong mga presentasyon. Mahimo usab kitang mosangyaw sa gabii o sa ubang panahon diin ang mga tawo anaa sa balay. Mahimo usab kitang magtuon ug bag-ong pinulongan aron mas daghan pa kitag masangyawan. Mapauswag usab nato ang atong ministeryo pinaagi sa pagregular payunir. O kaha mobalhin kitag dapit diin mas dako ang panginahanglan. Kon kita may hustong tinamdan sa pagpangani, maningkamot kita nga makapakigbahin niining hinungdanong buluhaton kutob sa atong maarangan.
7. Hangtod kanus-a kita magpadayon sa pagpangani?
7 Sanglit limitado rag panahon ang mga mag-uuma sa pagtigom sa ilang giani, dili sila angayng magrelaks-relaks hangtod mahuman ang pagpangani. Kini usab ang angay natong tinamdan sa espirituwal nga pagpangani. Hangtod kanus-a kaha kini matapos? Hangtod sa “kataposan sa sistema sa mga butang.” (Mat. 24:14; 28:20) Sama kang Jesus, buot natong humanon ang buluhaton nga gipiyal kanato. (Juan 4:34; 17:4) Busa magpadayon kita sa pagtuman sa atong ministeryo uban ang kadasig, kalipay, ug positibong tinamdan hangtod sa kataposan. (Mat. 24:13) Ang pagpangani wala pa matapos!
[Blurb sa panid 2]
Ang pagpangani maoy puliki nga kalihokan sukad sa sinugdan hangtod sa kataposan