Magmapailobon sa Ministeryo
1. Sa unsang paagi si Jehova nagpakitag pailob sa katawhan?
1 Ang Diyos mapailobon kaayo sa katawhan. (Ex. 34:6; Sal. 106:41-45; 2 Ped. 3:9) Usa sa talagsaong paagi nga iyang gipakita ang pailob mao ang pagsangyaw sa Gingharian sa tibuok kalibotan. Si Jehova nakiglabot sa katawhan sa halos 2,000 ka tuig, ug padayon niyang gidapit ang mga matinud-anog kasingkasing sa pagpakigsuod kaniya. (Juan 6:44) Unsaon nato pagsundog ang pagkamapailobon ni Jehova diha sa atong ministeryo?
2. Sa unsang paagi atong ikapakita ang pailob sa pagpamalaybalay?
2 Sa Pagpamalaybalay: Atong masundog ang pailob ni Jehova pinaagi sa pagsangyaw nga ‘walay hunong’ diha sa mga teritoryo nga wala pay nagpakitag interes. (Buh. 5:42) Mapailobon kitang molahutay sa kawalay pagtagad, pagbiaybiay, ug sa pagsupak. (Mar. 13:12, 13) Kita mapailobon usab pinaagi sa padayong pagbisibis sa binhi sa kamatuoran bisan pag lisod nga makakitag interesado diha sa balay.
3. Nganong gikinahanglan ang pailob sa pagbalikduaw ug pagdumalag pagtuon sa Bibliya?
3 Sa mga Gitun-an sa Bibliya: Nagkinahanglag pailob ang pagpatubog tanom. Ato kining maatiman, pero dili nato mapadali ang pagtubo niini. (Sant. 5:7) Sa susama, ang espirituwal nga pagtubo maoy inanay. (Mar. 4:28) Kadtong atong gitun-an basin malisdan sa pagbiya sa bakak nga mga pagtulon-an o sa dili Kasulatanhong mga kostumbre. Dili nato dalion ang pagtubo pinaagi sa pagpugos kanila nga mohimog mga kausaban. Gikinahanglan ang pailob sa pagtugot ug igong panahon aron ang espiritu sa Diyos magpalihok sa ilang kasingkasing.—1 Cor. 3:6, 7.
4. Sa unsang paagi makatabang ang pailob sa epektibong pagsangyaw sa dili magtutuong mga paryente?
4 Sa Dili Magtutuong mga Paryente: Bisan tuod gusto natong makakat-on sa kamatuoran ang atong mga paryente, atong ikapakita ang pailob pinaagi sa paghulat sa hustong panahon sa pagsangyaw kanila ug sa dili pagpaambit kanila ug daghan kaayong impormasyon. (Eccl. 3:1, 7) Kasamtangan, ang atong panig-ingnan makahatag ug pamatuod kanila ug andam kitang mopahayag sa atong pagtuo sa kalmado ug matinahorong paagi. (1 Ped. 3:1, 15) Busa ang pagpakitag pailob sa ministeryo mas epektibo ug makapalipay sa atong langitnong Amahan.