Ang Labing Hinungdanong Hiyas sa Maayong Magtutudlo
1. Unsa ang labing hinungdanong hiyas sa usa ka maayong magtutudlo?
1 Unsay makapahimo sa usa ingong maayong magtutudlo sa Bibliya? Sekular nga edukasyon? Kasinatian? Kinaiyanhong katakos? Dili, kondili ang gugma. Pinaagi niini mailhan ang mga tinun-an ni Jesus. Kini ang katumanan sa Balaod ug ang kinalabwan ug labing madanihon sa pangunang mga hiyas ni Jehova. (Juan 13:35; Gal. 5:14; 1 Juan 4:8) Ang maayong mga magtutudlo nagpasundayag niini nga hiyas.
2. Nganong hinungdanon nga magpakita tag gugma sa mga tawo?
2 Higugmaa ang mga Tawo: Si Jesus, ang Dakong Magtutudlo, nahigugma sa mga tawo, ug tungod niini sila naminaw kaniya. (Luc. 5:12, 13; Juan 13:1; 15:13) Kon kita nahingawa sa mga tawo, kita mosangyaw sa tanang higayon. Ang paglutos ug kawalay interes dili makapaluya kanato. Ipakita nato ang tim-os nga kahingawa sa atong gisangyawan, ug ipahaom nato ang atong presentasyon sumala sa ilang kahimtang. Andam kitang mogahig panahon sa tanan natong Bible study ug sa pagpangandam sa matag pagtuon.
3. Sa unsang paagi ang gugma sa kamatuoran makatabang kanato sa atong ministeryo?
3 Higugmaa ang Kamatuoran: Gihigugma usab ni Jesus ang kamatuoran ug gipakabahandi kini. (Mat. 13:52) Kon gihigugma nato ang kamatuoran, kita mosangyaw nga madasigon, ug kini makadasig usab sa atong gisangyawan. Kini motabang kanato sa pagsentro sa atong pagtagad sa kabililhon sa mensahe nga atong gisangyaw inay sa atong mga limitasyon, ug tungod niini dili na kaayo ta makulbaan.
4. Unsaon nato pag-ugmad ang gugma?
4 Ugmara ang Gugma: Sa unsang paagi maugmad nato ang paghigugma sa mga tawo? Pinaagi sa pagpalandong sa gugma nga gipakita ni Jehova ug sa iyang Anak ug sa makaluluoy nga kahimtang sa mga tawo sa atong teritoryo. (Mar. 6:34; 1 Juan 4:10, 11) Molalom ang atong gugma sa kamatuoran pinaagi sa regular nga pagtuon ug pagpamalandong. Ang gugma maoy bahin sa bunga sa espiritu. (Gal. 5:22) Busa makahangyo ta kang Jehova nga giyahan sa iyang balaang espiritu ug tabangan ta nga maugmad ang gugma. (Luc. 11:13; 1 Juan 5:14) Bisag unsay atong edukasyon, kasinatian sa pag-alagad, o kinaiyanhong katakos, mahimo kitang epektibong magtutudlo sa Bibliya pinaagi sa pagpasundayag ug gugma.