Tulo ka Sugyot Aron Mouswag ang Imong Katakos sa Pagtudlo
1. Nganong gusto natong mouswag ang atong katakos sa pagtudlo?
1 Ang tanang Saksi maoy mga magtutudlo. Sa atong unang pagduaw, pagbalik aron halingon ang interes, o pagdumalag pagtuon sa Bibliya, kita naghatag ug impormasyon. Ug ang impormasyon nga atong ginatudlo dili ordinaryo. Ginapatin-aw nato ang “balaang mga sinulat,” nga makahimo sa mga tawo nga “maalamon alang sa kaluwasan.” (2 Tim. 3:15) Pagkatalagsaong pribilehiyo! Aniay tulo ka sugyot aron mouswag ang atong katakos sa pagtudlo.
2. Sa unsang paagi mahimong simple ang atong pagtudlo?
2 Pagkasimple: Kon nahibaloan nato pag-ayo ang usa ka ulohan, malimtan nato kon unsa kaha ka komplikado kana alang sa usa nga walay alamag. Busa sa dihang magdumalag pagtuon sa Bibliya, ayaw luboga ang imong pagtudlo pinaagi sa paghisgot ug daghang detalye. Ipasiugda hinuon ang mga pangunang punto. Wala magpasabot nga maayo kang motudlo kon daghan kag isulti. (Prov. 10:19) Sagad, labing maayo nga yawing mga teksto lang ang basahon. Human mabasa ang teksto, ipasiugda ang bahin niini nga konektado sa ulohan. Ang Wali sa Bukid, nga nasulat sa Mateo kapitulo 5 ngadto sa 7, naghisgot ug talagsaon kaayong mga kamatuoran, apan si Jesus nagtudlo sa simple nga paagi ug migamit ug diyutay apan pinili kaayong mga pulong.
3. Unsa ka hinungdanon ang mga ilustrasyon, ug kasagaran unsay labing maayong mga ilustrasyon?
3 Mga Ilustrasyon: Ang mga ilustrasyon makapalihok sa hunahuna, makatandog sa kasingkasing, ug makatabang sa memorya. Ayawg hunahunaa nga kinahanglang batid kang estoryador aron makahatag kag maayong mga ilustrasyon. Ang mga ilustrasyon ni Jesus sagad mugbo ug simple. (Mat. 7:3-5; 18:2-4) Mahimong mapuslanon usab ang simpleng mga drowing. Ang pagpangandam makatabang kanimo sa paghunahunag epektibong mga ilustrasyon.
4. Unsa ang epektibong paagi sa paggamit ug mga pangutana?
4 Mga Pangutana: Ang mga pangutana makatukmod sa imong estudyante sa paghunahuna. Busa, human mangutana, magmapailobon. Kon tubagon mo dayon ang pangutana, di nimo mahibaloan kon unsay nasabtan sa estudyante. Kon sayop ang iyang tubag, mas maayo nga mosukna kag dugang pangutana aron magiyahan siya sa hustong tubag, imbes nga ikay mohatag sa hustong tubag. (Mat. 17:24-27) Siyempre, walay usa kanato ang hingpit nga magtutudlo. Busa, ang Bibliya nagdasig kanato nga tagdon kanunay ang atong paagi sa pagtudlo. Kon himoon nato kana, kita ug kadtong namati kanato makatagamtam ug walay kataposang mga benepisyo.—1 Tim. 4:16.