Panalipdi ang Imong Tanlag
1. Unsa ang tema sa espesyal nga asembliya sa 2013, ug unsay katuyoan sa programa?
1 Kada adlaw, kita naladlad sa mga situwasyon diin mahimong malapas nato ang atong tanlag. Tungod niana, ang tema sa programa sa atong espesyal nga asembliya sa tuig 2013 maoy “Panalipdi ang Imong Tanlag.” (1 Tim. 1:19) Ang programa gidisenyo aron tabangan ang matag usa nga seryosong tagdon kon giunsa nato paggamit kining talagsaong gasa gikan sa atong Maglalalang.
2. Unsang hinungdanong mga pangutana ang tubagon panahon sa programa?
2 Pangitaa Kini nga mga Punto: Tubagon sa programa ang pito ka hinungdanong pangutana bahin sa tanlag:
• Unsay makapadaot sa tanlag?
• Sa unsang paagi mabansay nato ang atong tanlag?
• Sa unsang paagi kita mahimong hinlo gikan sa dugo sa tanang tawo?
• Unsay ipadayag sa atong paghunahuna ug paglihok uyon sa mga prinsipyo sa Bibliya?
• Sa unsang paagi malikayan nato nga masamdan ang tanlag sa uban?
• Mga batan-on, sa unsang paagi makapabilin mong lig-on sa dihang pit-oson nga mokompromiso?
• Unsang mga panalangin ang matagamtam niadtong nagsunod sa ilang binansay-sa-Bibliya nga tanlag?
3. Sa unsang paagi makabenepisyo kita sa programa?
3 Sa tabang ni Jehova atong masuklan ang mga paningkamot ni Satanas nga daoton ang atong tanlag. Pinaagi sa Pulong sa Diyos ug sa iyang organisasyon, ang atong mahigugmaong langitnong Amahan nagasulti kanato: “Mao kini ang dalan. Lakaw kamo niini.” (Isa. 30:21) Kini nga programa maoy usa ka paagi nga si Jehova nagtagana sa maong giya. Busa, hikaya nga makatambong sa tibuok programa. Pamati pag-ayo, ug pamalandonga kon sa unsang paagi nimo mapadapat ang maong impormasyon. Angayng hisgotan sa tibuok pamilya ang programa. Ang pagpadapat sa instruksiyon nga atong madawat makapalig-on kanato nga magpadayon sa “paghupot ug maayong tanlag” ug makatabang kanato nga dili mahitipas sa dalan ni Jehova tungod sa lumalabayng kalingawan sa kalibotan ni Satanas.—1 Ped. 3:16.