Himoa Ninyong Sumbanan ang mga Manalagna—Si Joel
1. Sa unsang paagi nato masundog ang pagkamapainubsanon ni Joel samtang kita magsangyaw?
1 Kinsa si manalagnang Joel? Gibutyag lamang niya nga siya ang “anak nga lalaki ni Petuel.” (Joel 1:1) Gipasiugda niining mapainubsanong manalagna ang mensahe ni Jehova, dili ang iyang papel ingong mensahero. Sa atong ministeryo usab, buot nato nga ang hatagag pagtagad mao si Jehova ug ang Bibliya, inay ang atong kaugalingon. (1 Cor. 9:16; 2 Cor. 3:5) Dugang pa, kita mapalig-on sa mensahe nga atong gimantala. Unsang mga aspekto sa tagna ni Joel ang maghatag natog kasibot ug paglaom karon?
2. Kay duol na ang adlaw ni Jehova, unsay angay natong himoon?
2 “Ang Adlaw ni Jehova Haduol Na.” (Joel 1:15): Bisag kining mga pulonga dugay na kaayong gisulat, atong nasaksihan karon ang bug-os nga katumanan niini. Ang nagkagrabeng kahimtang sa kalibotan ug ang pagkawalay interes ug pagkamabiaybiayon sa mga tawo sa atong teritoryo nagpamatuod gayod nga ania na kita sa kataposang mga adlaw niining daotang sistema sa mga butang. (2 Tim. 3:1-5; 2 Ped. 3:3, 4) Kon palandongon nato nga duol na gayod ang kataposan, nan unahon nato sa atong kinabuhi ang atong ministeryo.—2 Ped. 3:11, 12.
3. Nganong hinungdanon kaayo ang pagsangyaw samtang nagkaduol ang dakong kasakitan?
3 “Si Jehova Mahimong Dalangpanan sa Iyang Katawhan.” (Joel 3:16): Ang pag-uyog nga gihisgotan niini nga bersikulo mapadapat lamang sa paghukom ni Jehova panahon sa dakong kasakitan. Kita malipay sa pagkahibalo nga luwason ni Jehova ang iyang maunongong mga alagad nianang panahona. (Pin. 7:9, 14) Samtang makita nato nga kita gitabangan ug gipaluyohan ni Jehova sa dihang magsangyaw, mas molig-on ang atong pagtuo ug determinasyon aron makalahutay ta sa nagsingabot nga dakong kasakitan.
4. Nganong kita angayng magmalipayon ug magmasaligon sa umaabot?
4 Bisag giingon sa uban nga ang mensahe ni Joel maoy mensahe sa paghukom, kini naghatag ug mahimayaong paglaom sa kaluwasan alang sa katawhan sa Diyos. (Joel 2:32) Busa kita angayng magmasaligon sa umaabot ug magmasiboton sa pagmantala sa maayong balita sa Gingharian sa Diyos sumala sa pagdasig kanato sa Joel 2:23: “Paglipay ug pagmaya diha kang Jehova nga inyong Diyos.”