Himoa Ninyong Sumbanan ang mga Manalagna—Si Amos
1. Nganong ang panig-ingnan ni Amos makapadasig kanato?
1 Mibati ka ba sukad nga dili takos sa pagsangyaw tungod kay kabos kag kagikan? Kon mao, sundoga si Amos aron ka magmaisogon. Siya tigbuhig karnero ug usahay mamumuo sa uma, pero gihatagan siya ni Jehova ug kaisog sa pagmantalag bug-at nga mensahe. (Amos 1:1; 7:14, 15) Sa susama, sa atong adlaw, si Jehova mogamit niadtong mga kabos ug timawa. (1 Cor. 1:27-29) Unsay ubang leksiyon nga atong makat-onan kang manalagnang Amos para sa atong ministeryo?
2. Nganong kita makapabiling lig-on atubangan sa pagsupak sa ministeryo?
2 Magpabiling Lig-on Atubangan sa Pagsupak: Si Amazias usa ka magsisimbag baka nga saserdote sa napulog-tribo nga amihanang gingharian sa Israel. Dihang nakadungog siya sa tagna ni Amos, samag siya masuk-anong mitubag: ‘Uli sa inyo! Ayaw mig hilabti! May relihiyon na mi!’ (Amos 7:12, 13) Sa iyang paghangyo kang Haring Jeroboam nga idili ang buluhaton ni Amos, gituis ni Amazias ang mga pulong sa manalagna. (Amos 7:7-11) Apan si Amos wala mahadlok. Sa atong adlaw, adunay pipila ka klerigo nga naghulhog sa politikanhong mga pangulo aron lutoson ang katawhan ni Jehova. Apan si Jehova nagpasalig kanato nga walay hinagiban nga buhaton batok kanato ang magmalamposon.—Isa. 54:17.
3. Unsa ang duha ka bahin sa atong mensahe?
3 Imantala ang Paghukom sa Diyos ug ang Umaabot nga mga Panalangin: Bisag gitagna ni Amos ang paghukom batok sa napulog-tribo nga gingharian sa Israel, gitapos niya ang iyang basahon uban ang saad ni Jehova bahin sa pagpasig-uli ug sa dagayang panalangin. (Amos 9:13-15) Kita mosangyaw usab sa umaabot nga “adlaw sa paghukom” sa Diyos, apan kini maoy bahin lang sa “maayong balita sa gingharian” nga kinahanglan natong imantala. (2 Ped. 3:7; Mat. 24:14) Ang paglaglag ni Jehova sa mga daotan sa Armagedon mag-andam sa dalan alang sa paraisong yuta.—Sal. 37:34.
4. Nganong segurado kita nga atong mabuhat ang kabubut-on ni Jehova?
4 Ang pagsangyaw sa mensahe sa Gingharian niining kalibotan nga daghag magsusupak magsulay gayod sa atong determinasyon sa pagtuman sa atong panaad nga buhaton ang kabubut-on ni Jehova. (Juan 15:19) Apan segurado kita nga si Jehova padayong magsangkap kanato sa pagbuhat sa iyang kabubut-on, sama sa iyang gihimo kang Amos.—2 Cor. 3:5.