Himoa Ninyong Sumbanan ang mga Manalagna—Si Oseas
1. Unsa nga pangutana ang tingali imong gisukna sa imong kaugalingon?
1 ‘Unsang mga sakripisyo ang akong himoon alang kang Jehova?’ Tingali nakapangutana ka niini sa dihang namalandong ka sa iyang dagayang kalulot ug kaluoy. (Sal. 103:2-4; 116:12) Si Oseas andam nga mibuhat sa sugo nga gipabuhat ni Jehova kaniya, bisan pag nagkinahanglan kadtog pagsakripisyo. Unsaon nato pagsundog si Oseas?
2. Sa unsang paagi masundog nato ang maayong panig-ingnan ni Oseas sa paglahutay sa pagsangyaw?
2 Sangyaw sa Masamok nga Panahon: Ang mensahe ni Oseas gitumong mismo ngadto sa napulo ka tribong gingharian sa Israel, diin ang matuod nga pagsimba hapit nga mahanaw. Gibuhat ni Haring Jeroboam II ang daotan sa mga mata ni Jehova ug gipadayon ang pagsimba sa nating baka nga gisugdan ni Jeroboam I. (2 Hari 14:23, 24) Gisubay gihapon sa misunod nga mga hari ang naut-ot nga espirituwalidad sa napulo ka tribong gingharian hangtod nga kini nalaglag niadtong 740 B.C.E. Bisan pa sa bakak nga pagsimba, si Oseas matinumanong nag-alagad ingong manalagna sulod sa mga 59 ka tuig. Kita determinado ba usab sa pagsangyaw sa tanang panahon, bisan pa sa pagkawalay-interes ug pagsupak sa mga tawo?—2 Tim. 4:2.
3. Sa unsang paagi ang kinabuhi ni Oseas nag-ilustrar sa kaluoy ni Jehova?
3 Pabilhi ang Kaluoy ni Jehova: Gisugo ni Jehova si Oseas sa pagminyo ug “asawa nga makihilawason.” (Os. 1:2) Bisan tuod ang iyang asawa nga si Gomer nanganak ug anak nga lalaki pinaagi kang Oseas, mopatim-aw nga sa ulahi ang iyang asawa may duha ka anak sa gawas. Ang pagkaandam ni Oseas sa pagpasaylo sa iyang asawa nag-ilustrar sa dakong kaluoy ni Jehova sa masukihong Israel sa dihang kini naghinulsol. (Os. 3:1; Roma 9:22-26) Andam ba natong ihiklin ang atong gusto aron ikamantala ang kaluoy ni Jehova ngadto sa tanang matang sa tawo?—1 Cor. 9:19-23.
4. Unsa ang mga sakripisyo nga puwede natong himoon alang kang Jehova?
4 Ang ubang mga alagad ni Jehova naghiklin sa ilang trabaho nga dakog kita aron makagugol ug dugang panahon sa ministeryo. Ang uban nagpabiling tagsaanon o walay anak aron unahon ang Gingharian. Kon palandongon nato ang kinabuhi ni Oseas, tingali makaingon ta, ‘Di gyod tingali ko makasundog sa iyang gihimo.’ Apan, samtang mouswag ang atong pagpabili sa dili-takos nga kalulot ni Jehova ug mosalig ta sa iyang balaang espiritu sa paghatag natog kusog, tingali iya tang gamiton sa mga paaging wala nato damha, sama kang Oseas.—Mat. 19:26; Filip. 2:13.