Himoa Ninyong Sumbanan ang mga Manalagna—Si Miqueas
1. Unsang pangutana ang lagmit gipamalandong ni Miqueas, ug nganong wala makawang ang iyang pangsangyaw?
1 ‘Kanus-a matapos kining daotang sistema sa mga butang?’ Lagmit gipamalandong usab kini ni manalagnang Miqueas dihang nagmantala siya sa mga mensahe sa paghukom ni Jehova batok sa gingharian sa Israel ug Juda. Wala makawang ang iyang pagsangyaw. Sa 740 B.C.E. natuman ang mga pulong ni Jehova batok sa Samaria samtang buhi pa si Miqueas. (Miq. 1:6, 7) Sa ulahi, ang Jerusalem nalaglag sa 607 B.C.E. (Miq. 3:12) Unsaon nato pagsundog si Miqueas samtang nagpaabot sa pagkatuman sa mga paghukom ni Jehova sa atong adlaw?
2. Sa unsang paagi nato ikapakita ang pailob samtang nagpaabot sa adlaw ni Jehova, ug ngano?
2 Magmapailobon: Si Miqueas misulat: “Bahin kanako, magalantaw ako kang Jehova. Magpakita ako ug mahulatong tinamdan sa Diyos sa akong kaluwasan.” (Miq. 7:7) Siyempre, wala kini magpasabot nga si Miqueas basta nagpaabot lang sa kataposan ug walay gihimo. Okupado siya sa pagpanagna. Samtang nagpaabot sa adlaw ni Jehova, angayng magmaaktibo sab kita sa “balaang mga buhat sa panggawi ug mga buhat sa diyosnong pagkamahinalaron.” (2 Ped. 3:11, 12) Tungod sa pailob ni Jehova, ang mga tawo dunay kahigayonan sa paghinulsol. (2 Ped. 3:9) Busa, seryosohon nato ang tambag sa Bibliya nga sundogon ang pagkamapailobon sa mga manalagna.—Sant. 5:10.
3. Nganong mangayo kitag balaang espiritu ni Jehova?
3 Salig sa Kusog ni Jehova: Lisod ang asaynment ni Miqueas pero misalig siya sa kusog ni Jehova aron iyang matuman kana. (Miq. 3:8) Busa kita giawhag sa Bibliya nga mangayog kusog gikan kang Jehova. Mohatag siyag kusog sa mga gikapoy aron matuman ang teokratikanhon nilang mga responsabilidad. (Sal. 84:5, 7; Isa. 40:28-31) Nakasinati ka ba niini sa imong sagradong pag-alagad? Kanunay mo bang gipangayo ang tabang sa balaang espiritu ni Jehova?—Luc. 11:13.
4. Unsang maayong panig-ingnan ang gihatag ni Miqueas alang kanato karon?
4 Sa tibuok niyang kinabuhi, prayoridad ni Miqueas ang pagbuhat sa kabubut-on sa Diyos. Siya determinadong magmatinumanon bisag gilibotan ug pagkadaotan. Ang atong pagkamatinumanon adlaw-adlaw nga gisulayan sab karon. Busa, atong lig-onon ang atong determinasyong “magalakaw sa ngalan ni Jehova nga atong Diyos hangtod sa panahong walay tino, bisan hangtod sa kahangtoran.”—Miq. 4:5.