Himoa Ninyong Sumbanan ang mga Manalagna—Si Sofonias
1. Unsay kahimtang dihang si Sofonias nag-alagad ingong propeta, ug nganong maayo siyang panig-ingnan para nato?
1 Sa tungatunga sa ikapitong siglo B.C.E. kaylap kaayo sa Juda ang pagsimba kang Baal. Bag-o pang gipatay ang daotang hari nga si Amon, ug ang batan-ong si Josias mao nay hari. (2 Cron. 33:21–34:1) Nianang panahona, gisugo ni Jehova si Sofonias sa pagpahayag ug mga mensahe sa paghukom. Si Sofonias lagmit kaliwat sa mga hari sa tribo ni Juda, pero wala siya mahadlok sa pagsulti sa mensahe ni Jehova sa mga lider sa Juda. (Sof. 1:1; 3:1-4) Kita usab maningkamot sa pagsundog sa kaisog ni Sofonias ug dili motugot nga babagan sa atong mga paryente ang atong pagsimba kang Jehova. (Mat. 10:34-37) Unsang mensahe ang gipahayag ni Sofonias, ug unsay resulta niana?
2. Unsay atong himoon aron luwason ta ni Jehova sa adlaw sa iyang kasuko?
2 Pangitaa si Jehova: Si Jehova lang ang makaluwas sa mga tawo sa adlaw sa iyang kasuko. Busa giawhag ni Sofonias ang katawhan sa Juda nga pangitaon si Jehova, pangitaon ang pagkamatarong, ug ang pagkamaaghop samtang duna pay panahon. (Sof. 2:2, 3) Tinuod usab kana karon. Sama kang Sofonias, kita nag-awhag sa uban nga pangitaon si Jehova, pero angay pod tang mohimo niana ug dili gayod ‘mobiya sa pagsunod kang Jehova.’ (Sof. 1:6) Ang pagpangita kang Jehova nagpasabot nga kita magmakugihon sa pagtuon sa iyang Pulong ug mag-ampo alang sa giya. Ang pagpangita sa pagkamatarong nagpasabot nga kita magkinabuhing hinlo sa moral. Ug ang pagpangita sa pagkamaaghop nagkahulogan nga kita maningkamot nga magpasakop ug andam mosunod sa direksiyon sa organisasyon ni Jehova.
3. Nganong angay nga positibo ta kanunay sa atong ministeryo?
3 Maayong mga Resulta: Ang paghukom nga gipahayag ni Sofonias dunay epekto sa ubay-ubayng tawo, ilabina sa batan-ong si Josias, kinsa nagsugod sa pagpangita kang Jehova sa bata pa siya. Sa ngadtongadto, gipangusgan niya ang pagwagtang sa bakak nga pagsimba sa Juda. (2 Cron. 34:2-5) Karon, bisag ang ubang binhi sa Gingharian mahulog sa dalan, sa kabatoan, ug sa kasampinitan, dunay mahulog sa maayong yuta diin kini mamunga. (Mat. 13:18-23) Kita makasalig nga panalanginan ni Jehova ang atong makugihong pagsabwag sa binhi sa Gingharian.—Sal. 126:6.
4. Nganong ‘magpadayon kita sa paghulat kang Jehova’?
4 Ang ubang tawo sa Juda nagtuo nga dili molihok si Jehova. Apan si Jehova nagpasalig nga ang iyang dakong adlaw duol na. (Sof. 1:12, 14) Kadto lamang modangop kaniya ang maluwas. (Sof. 3:12, 17) Samtang ‘nagpadayon kita sa paghulat kang Jehova,’ hinaot nga magmalipayon kita sa pag-alagad sa atong gamhanang Diyos uban sa atong mga igsoon!—Sof. 3:8, 9.