Ang 2015 nga Teokratikanhong Tunghaan sa Ministeryo Motabang Nato sa Pagpauswag sa Atong Pagpanudlo

¹ Ang salmistang si David misulat: “Hinaot nga ang mga pulong sa akong baba ug ang pagpamalandong sa akong kasingkasing mahimong kahimut-anan sa imong atubangan, Oh Jehova nga Bato ko ug Manunubos ko.” (Sal. 19:14) Gusto sab natong makapalipay kang Jehova ang atong mga pulong kay gipabilhan nato ang atong pribilehiyo sa pagsulti sa kamatuoran diha sa kongregasyon ug sa ministeryo. Ang Teokratikanhong Tunghaan sa Ministeryo maoy usa ka paagi nga kita gibansay ni Jehova alang niini. Kini nga pagbansay ginahimo kada semana sa kapig 111,000 ka kongregasyon sa tibuok kalibotan. Nakatabang kini sa mga igsoon sa tibuok kalibotan nga lainlaig kahimtang aron mokuwalipikar ingong mga ministro sa maayong balita, ug makapanudlo nga madanihon, may taktika, ug kaisog.—Buh. 19:8; Col. 4:6.

² Lakip sa eskedyul sa tunghaan sa 2015 ang mga ulohan diha sa “An Introduction to God’s Word” (Introduksiyon sa Pulong sa Diyos) ug sa “Glossary of Bible Terms” nga makita sa rebisadong New World Translation, ingon man ang materyal nga gikan sa Pagtugkad sa Kasulatan, Tomo 1. May mga kausaban sab sa oras nga igahin alang sa pangunang mga punto sa pagbasa sa Bibliya ug sa Asaynment Num. 1. Hisgotan sa mosunod nga mga parapo ang mga kausaban nga naglakip sa mga instruksiyon kon unsaon pagpresentar ang mga bahin sa tunghaan.

³ Pangunang mga Punto sa Pagbasa sa Bibliya: Ang mga brader nga hatagan niining bahina dunay duha ka minuto nga maghisgot ug usa ka maayo ug praktikal nga punto sa Kasulatan gikan sa senemanang pagbasa sa Bibliya. Kinahanglang mangandam ug maayo aron mapaambit ang hinungdanong punto sulod sa gitakdang oras. Human niana, ang kongregasyon may unom ka minuto gihapon sa pagkomento. Ang mga igsoon makakomento ug tag-30 segundos o ubos pa bahin sa maayong punto nga ilang nakat-onan. Nagkinahanglag pagpangandam ug disiplina sa kaugalingon aron makahatag ug maayong komento sulod sa 30 segundos, apan maayo ni nga pagbansay para nato. Kini makahatag sab ug higayon sa uban sa pagkomento sa ilang nakat-onan sa ilang pag-research.

⁴ Asaynment Num. 1: Ang gitakdang oras sa pagbasa sa Bibliya gipaubsan ngadto sa tulo ka minuto o ubos pa ug mubo na lang ang materyal nga basahon. Kadtong hatagan niining bahina kinahanglang magpraktis sa makadaghan pinaagi sa pagbasag kusog ug sa pagmatikod sa hustong paglitok ug pagkalarino aron masabtan sa mamiminaw. Ang tanang alagad ni Jehova kinahanglang maningkamot nga mahimong maayong magbabasa, kay importante kini nga bahin sa atong pagsimba. Makapalipay gayod nga daghan kaayo sa atong kabataan ang maayong mobasa! Dalayegon ang mga ginikanan nga naningkamot sa pagbansay sa ilang mga anak.

⁵ Asaynment Num. 2: Kini maoy singko minutos nga presentasyon nga iasayn ngadto sa usa ka sister. Angayng gamiton ang gihatag nga tema. Kon ang asaynment gibase sa rebisadong New World Translation, kinahanglang ipadapat kini sa usa ka paagi sa pagsangyaw nga realistiko ug praktikal sa lokal nga teritoryo. Kon ang asaynment gibase sa usa ka karakter sa Bibliya diha sa Pagtugkad sa Kasulatan, Tomo 1, kinahanglang tun-an sa estudyante ang materyal ubos sa ngalan sa maong karakter, pilion ang haom nga teksto, ug ipatin-aw kon unsay makat-onan gikan niini nga karakter. Mahimong ilakip ang ubang teksto nga nalangkit sa tema. Ang magtatan-aw sa tunghaan mag-asayn ug usa ka asistant o partner.

⁶ Asaynment Num. 3: Kini maoy singko minutos nga presentasyon nga puwedeng iasayn sa brader o sister. Kon sister ang asaynan, kining bahina ipresentar nga pareho sa Asaynment Num. 2. Kon brader ang asaynan, ang materyal nga binase sa Pagtugkad ihatag ingong pakigpulong nga haom sa panginahanglan sa mamiminaw. Tagikon sa estudyante ang tema, pilion ang haom nga mga teksto, ug ipatin-aw kon unsay makat-onan gikan sa panig-ingnan sa karakter sa Bibliya.

⁷ Bag-ong Paagi sa Pagpresentar sa Asaynment Num. 3 Para sa mga Brader: Kon ang asaynment gibase sa rebisadong New World Translation, ipresentar kini ingong demonstrasyon sa pamilyahanong pagsimba o pagsangyaw. Sagad ang magtatan-aw maoy maghatag ug asistant ug setting. Ang asistant kinahanglang sakop sa pamilya sa estudyante o usa ka brader sa kongregasyon. Mahimong ilakip sa presentasyon ang mga teksto nga nagpasiugda sa mga prinsipyo sa Bibliya nga nalangkit sa tema. Usahay, kini nga bahin iasayn ngadto sa usa ka ansiyano. Ang mga ansiyano makapilig asistant ug setting. Seguradong madasig ang kongregasyon nga makita ang katakos sa pagpanudlo sa mga ansiyano uban sa iyang membro sa pamilya o sa laing brader.

⁸ Tambag: Human sa bahin sa matag estudyante, may duha ka minuto ang magtatan-aw aron maghatag ug komendasyon ug makapalig-ong tambag base sa librong Pahimusli ang Edukasyon sa Teokratikanhong Tunghaan sa Ministeryo. Dihang ipaila sa magtatan-aw ang asaynment sa estudyante, dili una niya ipahibalo kon unsa nga talambagan kini bantayan. Human sa matag presentasyon, sinserong komendahan sa magtatan-aw ang estudyante, ipahibalo ang talambagan diin siya gibantayan ug espesipikong isulti kon giunsa niya pagpadapat ang maong talambagan, o malulotong ipatin-aw kon nganong mapuslanon sa estudyante nga pauswagon pa kanag dugang.

⁹ Ang porma sa talambagan sa estudyante anaa sa panid 79-81 sa iyang kopya sa librong Tunghaan sa Ministeryo. Human mahatag sa estudyante ang iyang bahin, ang magtatan-aw magnota diha sa libro sa estudyante ug pribadong mangutana kon iya bang gihimo ang pagbansaybansay diha sa giasayn nga punto sa talambagan. Komendahan ug tambagan ang estudyante pagkahuman sa tigom o sa laing higayon. Ang personal nga atensiyon nga madawat sa estudyante angayng isipon nga kahigayonan aron matabangan siyang mouswag sa espirituwal.—1 Tim. 4:15.

¹⁰ Kon mag-obertaym ang estudyante sa iyang bahin, ang magtatan-aw o ang iyang asistant kinahanglang abtik nga mosignal, sama sa pagbagting o paghimog bisan unsang tunog, aron makamatikod ang estudyante sa mataktikanhong paagi nga wala nay oras. Kon mosignal na ang magtatan-aw, kinahanglang taposon na sa estudyante ang iyang gisulti ug dayon mobiya sa plataporma.—Tan-awa ang librong Tunghaan sa Ministeryo, p. 282, par. 4.

¹¹ Gidasig ang tanang kuwalipikado nga magpaenrol sa Teokratikanhong Tunghaan sa Ministeryo. (Tan-awa ang librong Tunghaan sa Ministeryo, p. 282, par. 6.) Kini nga tunghaan nakatabang sa katawhan ni Jehova sa pagsangyaw ug pagtudlo sa maayong balita sa Gingharian nga may kombiksiyon, dignidad, ug gugma. Seguradong nalipay si Jehova sa mga pagdayeg niadtong mga nakapahimulos pag-ayo niining teokratikanhong edukasyon!—Sal. 148:12, 13; Isa. 50:4.