Tabangi ang mga Buta nga Makakat-on Bahin Kang Jehova

1. Giunsa pagpakita ni Jesus ang iyang kaluoy sa mga buta?

¹ Pipila na lang ka adlaw, patyon na si Jesus. Pagbiya niya sa siyudad sa Jerico, dihay duha ka buta nga misangpit niya: “Ginoo, kaluy-i kami!” Bisag naghunahuna sa pag-antos nga duol na niyang masinatian, si Jesus mihunong, gitawag ang mga buta, ug giayo sila. (Mat. 20:29-34) Unsaon nato pagsundog ang kaluoy ni Jesus sa mga buta?

2. Unsaon nato pagsangyaw sa mga buta nga atong mahimamat sa publikong mga dapit?

² Magmatinabangon: Kon makahimamat kag buta diha sa publikong mga dapit, ipaila imong kaugalingon ug pangitag paagi nga makatabang niya. Ang mga buta sagad abusohan sa mga tawo, busa basig dili dayon siya mosalig nimo. Pero kon sinsero ug mahigalaon ka, lagmit makuha nimo iyang pagsalig. Hinumdomi nga lainlain ang kagrabehon sa pagkabuta, nga mahimong basehan kon unsang tabang ang imong ikahatag niya. Human ka makatabang, tingali imo siyang masultihan nga nakigbahin ka sa buluhatong pagpanudlo bahin sa Bibliya. Pananghid nga basahan nimo siyag teksto, sama sa Salmo 146:8 o Isaias 35:5, 6. Kon makabasa siyag Braille, pangutana kon gusto ba siyag publikasyong Braille nga makatabang niya sa pagkat-og dugang bahin sa Bibliya. Puwede sab nimo siyang tabangan nga maka-download ug mga audio file gikan sa jw.org. Kon dunay screen reader program ang iyang computer, puwede niyang mapaminawan ang mga artikulo diha sa jw.org ug ang ubang publikasyon nga ma-download sa RTF (Rich Text Format).—Tan-awa ang kahong “Kon Unsaon Pagtabang ang mga Buta.”

3. Unsaon nato pagpangita ang mga buta diha sa atong teritoryo?

³ Pangitaa ang mga Buta: Talagsa ra kaayo tang makahimamat ug mga buta diha sa pagpamalaybalay, kay kadaghanan nila managana sa pagpakig-estorya sa mga tawong dili nila kaila. Busa, kinahanglan gyong ‘pangitaon’ sila aron masangyawan. (Mat. 10:11) Duna ba kay kauban sa trabaho o eskolmet nga buta? Pakig-estorya nila. Kon ang inyong teritoryo dunay eskuylahan para sa mga buta, itanyag ang pipila sa atong Braille nga mga publikasyon para sa ilang librarya. Duna ba kay nailhan nga may paryenteng buta? Diha sa inyong teritoryo, duna bay puy-anan para sa mga buta o organisasyon nga nagtaganag serbisyo para nila? Ipatin-aw sa ilang pamilya, sa receptionist, o sa tigdumala nga ang mga Saksi ni Jehova gusto gyong motabang sa mga buta. Saari sila nga magdala kag literatura nga Braille o mga audio recording. Ipakita ang saad sa Bibliya nga ayohon sa Diyos sa bug-os ang mga buta. Mahimo sab nimong ipatan-aw ang video sa jw.org nga “Without It, I Would Feel Lost,” nga naghisgot sa usa ka buta nga nakabenepisyo sa gihatag kaniya nga Bibliyang Braille. Ang pagpatin-aw sa imong tuyo sa pagduaw lagmit makatabang nga makasangyaw ka sa mga buta.

4. Unsay atong makat-onan sa eksperyensiya ni Janet?

⁴ Si Janet, usa ka buta nga sister, miduaw sa pasilidad nga dunay nagpuyo nga mga buta. May naestorya siya nga batan-ong babaye. Si Janet miingon kaniya, “Giayo ni Jesus ang mga buta aron ipakita kon unsa unyay iyang himoon para sa tanang buta.” Ilang gibasa ang Pinadayag 21:3, 4, ug gipatin-aw ni Janet kon unsaon pagtuman sa Gingharian sa Diyos ang maong saad. Wala makatingog ang babaye ug dayon miingon: “Karon pa ko kadungog ug buta nga nagsulti ini. Kadaghanan nagtuo nga ang tawo mabuta tungod sa iyang gihimo o sa gihimo sa iyang katigulangan.” Gi-email ni Janet sa babaye ang link sa librong Gitudlo sa Bibliya, ug karon sila nag-Bible study na kaduha sa usa ka semana.

5. Bisag dili ta makaayog mga buta sama sa gihimo ni Jesus, unsang panalangin ang atong madawat kon interesado ta sa pagtabang nila?

⁵ Tinuod, dili ta makaayog mga buta sama sa gihimo ni Jesus. Pero makatabang ta sa tanang nabutaan ni Satanas, apil na ang literal nga mga buta, nga makasabot sa kamatuoran sa Pulong sa Diyos. (2 Cor. 4:4) Si Jesus nag-ayo sa duha ka buta duol sa Jerico tungod sa iyang “kaluoy” nila. (Mat. 20:34) Kon ingon niana ang atong kaluoy sa mga buta, makapribilehiyo kita sa pagtabang ug pipila kanila nga makakat-on bahin kang Jehova, kinsa bug-os mag-ayo sa mga buta sa umaabot.