Mga Audio Recording—Kon Unsaon Kini Paggamit
1. Gawas sa giimprentang mga publikasyon, unsa pay laing tagana nga mapuslanon kanato?
1 Daghan ang ganahang mogamit sa jw.org dihang magbasag makapalipay ug hustong mga pulong sa kamatuoran. (Eccl. 12:10) Pero nakasulay na ba kag paminaw ug audio recording? Pinaagi niini daghan kag makat-onang impormasyon sa atong website. Unsay kaayohan sa pagpaminawg audio recording?
2. Sa unsang paagi magamit ang mga audio recording sa personal o pamilyahanong pagtuon?
2 Para sa Personal o Pamilyahanong Pagtuon: Kon maminaw tag mga audio recording sa Bibliya, magasin, o publikasyon samtang nagbiyahe o nagkurikuri, makatabang ni nga mapahimuslan pag-ayo ang atong panahon. (Efe. 5:15, 16) Sa atong pamilyahanong pagsimba, puwede pod tang maminawg audio recording sa atong publikasyon ug sundan kini diha sa atong kopya. Ang pagpaminawg audio recording panahon sa atong personal nga pagtuon makatabang nga mouswag ang atong katakos sa pagbasa o dihang magtuon tag laing pinulongan.
3. Kinsay makabenepisyo sa atong mga audio recording diha sa atong teritoryo?
3 Diha sa Ministeryo: Ang mga tawo diha sa atong teritoryo lagmit walay panahong mobasa, pero basin mosugot sila nga maminaw ug mga audio recording. Ang uban tingali lahig pinulongan ug mas mosanong sa mensahe sa Gingharian kon madungog nila kini sa ilang “kaugalingong pinulongan.” (Buh. 2:6-8) Sa ubang dapit, ang pagpaminaw maoy importanteng bahin sa ilang kultura. Pananglitan, sa kultura sa mga tawong Hmong, kasagaran ila rang iasoy ang ilang kasaysayan ngadto sa batan-ong henerasyon ug dili nila bastabastang malimtan ang ilang madunggan nga impormasyon. Daghang kultura sa Africa ang mas daling makakat-on pinaagig pagpaminaw.
4. Unsay atong ipangutana sa kaugalingon bahin sa pagtabang sa mga tawo diha sa atong teritoryo?
4 Sa inyong teritoryo, unsa kaha kon padunggon ang tagbalay ug audio recording diha sa iyang pinulongan? Kinsa kahay puwedeng padad-an ug audio recording pinaagig e-mail? Unsa kaha kon mag-download tag audio recording diha sa CD ug ihatag sa interesadong tagbalay apil ang giimprenta nga kopya? Puwede ma-report ang audio recording sa libro, brosyur, magasin, o tract nga atong mapahimutang. Magamit nato ang mga audio recording sa atong personal nga pagtuon ug sa pagpugas usab ug binhi sa kamatuoran sa Gingharian.—1 Cor. 3:6.