‘Walk by Faith, Not by Sight’

Sa hapit nang sakopon ug laglagon ang Jerusalem, si apostol Pablo misulat nga ang mga Kristohanon, ingong maayong mga sundalo ni Kristo, kinahanglang magdahom ug kalisdanan ug dili unahon ang kaugalingong tinguha ug kalipay. (2 Tim. 2:3, 4) Kay hapit nang laglagon kining dili diyosnong kalibotan, kinahanglang lig-on ang atong pagtuo aron makapabiling pokus sa espirituwal nga mga butang. (2 Cor. 4:18; 5:7) Tan-awa ang video nga ‘Walk by Faith, Not by Sight.’ (Ablihi ang jw.org, ug tan-awa sa PUBLICATIONS > VIDEOS.) Matikdi kon sa unsang paagi ang gugma sa materyal nga mga butang nahimong makamatay nga bitik kang Naham ug Abital. Dayon, repasoha ang mosunod nga mga pangutana.

(1) Unsa ang “dulumtanang butang . . . nga nagabarog diha sa usa ka balaang dapit” niadtong unang siglo, ug unsang desisyon ang kinahanglang himoon sa mga Kristohanon sa Jerusalem? (Mat. 24:15, 16) (2) Nganong nagkinahanglag pagtuo ang pagbiya sa Jerusalem? (3) Aron makabiya, unsay kinahanglang isakripisyo? (4) Nganong naglangaylangay si Naham ug Abital? (Mat. 24:17, 18) (5) Unsang dugang pagsulay sa pagtuo ang kinahanglang atubangon ni Rachel sa pagbiya sa Jerusalem? (Mat. 10:34-37; Mar. 10:29, 30) (6) Sa unsang paagi si Ethan maayong panig-ingnan sa pagtuo ug pagsalig kang Jehova? (7) Unsang kalisdanan ang naeksperyensiyahan sa mga Kristohanon sa Pella? (8) Nganong anam-anam nga mihuyang ang pagtuo ni Naham ug Abital? (9) Giunsa pag-atiman ni Jehova ang mga Kristohanon sa Pella? (Mat. 6:33; 1 Tim. 6:6-8) (10) Unsaon nato pagsundog si Abraham ug Sara samtang nagpaabot sa kataposan sa sistema sa mga butang? (Heb. 11:8-10) (11) Unsay mga hinungdan nga gustong mobalik si Naham ug Abital sa Jerusalem, ug nganong sayop ang maong panghunahuna? (Luc. 21:21) (12) Unsay tinuod nga kahimtang sa Jerusalem pagbalik ni Naham ug Abital? (13) Nganong kinahanglang palig-onon ang atong pagtuo karon sa dili pa moabot ang kataposan sa sistema sa mga butang?—Luc. 17:31, 32; 21:34-36.

Ang paglakaw pinaagi sa pagtuo nagpasabot nga kita (1) mosalig sa instruksiyon ni Jehova, (2) magpagiya sa iyang instruksiyon, ug (3) magpabili sa espirituwal kay sa materyal. Hinaot determinado kita sa paglakaw pinaagi sa pagtuo ug masaligon nga “ang kalibotan nagakahanaw ingon man ang tinguha niini, apan siya nga nagabuhat sa kabubut-on sa Diyos magpabilin hangtod sa kahangtoran.”—1 Juan 2:17.