Panalanginan Ka sa Diyos sa Walay Kataposan

Ang Diyos nagsaad kang propetang Abraham nga usa sa iyang mga kaliwat ang magdalag panalangin sa “tanang nasod sa yuta.” (Genesis 22:18) Kinsa ang maong kaliwat?

Mga 2,000 ka tuig sa miagi, gihatagan sa Diyos ang kaliwat ni Abraham nga si Jesus ug gahom sa paghimog mga milagro. Gipakita sa maong mga milagro nga ang gisaad kang Abraham moabot sa kanasoran pinaagi kang Jesus.​—Galacia 3:14.

Pinaagi sa mga milagro nga gihimo ni Jesus, ang mga tawo nakaila nga siya ang gipili sa Diyos nga magpanalangin sa katawhan, ug gipakita sab niini kon sa unsang paagi siya gamiton sa Diyos sa pagpanalangin sa katawhan sa walay kataposan. Matikdi kon sa unsang paagi ang mga milagro ni Jesus nagpakita sa pipila sa iyang nindot nga mga hiyas.

Mabination​—Si Jesus nag-ayo sa mga masakiton.

Kas-a, dihay sanlahon nga mihangyo nga ayohon siya ni Jesus. Gihikap siya ni Jesus ug giingnan: “Gusto ko!” Dihadiha nawala ang iyang sanla.​—Marcos 1:40-42.

Mahinatagon​—Si Jesus nagpakaon sa mga gigutom.

Dili gusto ni Jesus nga gutmon ang mga tawo. Dihay mga higayon nga gipakaon niya ang libolibo ka tawo; iyang gipadaghan ang pipila ka tinapay ug pipila ka gagmayng isda. (Mateo 14:17-21; 15:32-38) Human makakaon, ang tanan nangabusog ug daghan pang sobrang pagkaon.

Maluluy-on​—Si Jesus nagbanhaw ug patay.

Tungod sa kaluoy, gibanhaw ni Jesus ang bugtong anak sa nagbangotan nga biyuda kinsa wala nay moatiman.​—Lucas 7:12-15.