KRISTOHANONG PAGKINABUHI

Bag-ong Feature sa Midweek nga Tigom

Sugod sa Enero 2018, hisgotan sa midweek nga tigom ang study notes ug media nga gikan sa online study edition sa New World Translation of the Holy Scriptures (nwtsty), bisag ang study edition wala pa sa inyong pinulongan. Seguradong ang mga impormasyon niini makatabang sa imong pagpangandam sa tigom. Kini sab makapasuod nimo sa atong mahigugmaong Amahan, si Jehova!

STUDY NOTES

Ang study notes naghatag ug eksplinasyon sa kultura, lugar, ug mga termino sa daghang teksto sa Bibliya.

Mateo 12:20

Nagbaga nga pabilo: Ang sagad nga lampara sa balay maoy usa ka gamayng sudlanan nga may lana sa olibo. Ang pabilo mao ang mosuyop sa lana aron mosiga ang lampara. Ang Gregong ekspresyon nga “nagbaga nga pabilo” nagtumong tingali sa pabilo nga nag-aso kay naa pa kiniy baga pero nagkaawop na ang kalayo o napalong na. Ang tagna sa Isaias 42:3 naghisgot bahin sa kaluoy ni Jesus; dili niya palongon ang hapit nang maawop nga paglaom sa mga tawong mapainubsanon ug dinaogdaog.

Mateo 26:13

Sa pagkatinuod: Ang Gregong pulong nga a·menʹ, nga transliterasyon sa Hebreohanong pulong nga ʼa·menʹ, nagkahulogang “matuman kana,” o “segurado.” Si Jesus pirmeng naggamit niini nga ekspresyon dihang magsulti siyag pahayag, saad, o tagna, nga nagpasiugda nga tinuod ug kasaligan kini. Ang paggamit ni Jesus ug “sa pagkatinuod,” o amen, niining paagiha giingon nga talagsaon kaayo sa sagradong mga basahon. Dihang gisubli kini (a·menʹ a·menʹ), parehas sa kahimtang sa tibuok Ebanghelyo ni Juan, kini nga ekspresyon gihubad nga “sa pagkatinuod gayod.”—Ju 1:51.

MEDIA

Mga picture, drowing, ug mga video ug animation bahin sa mga impormasyon nga naa sa Bibliya.

Betfage, ang Bukid sa mga Olibo, ug Jerusalem

Kining mubong video nagpakita sa dalan nga padulong sa Jerusalem gikan sa sidlakan, sa baryo nga gitawag karon ug et-Tur—giingon nga mao kuno ang Betfage sa Bibliya—paingon sa mas taas nga bahin sa Bukid sa mga Olibo. Ang lokasyon sa Betania naa sa sidlakan sa Betfage, sa sidlakang bahin sa Bukid sa mga Olibo. Dihang didto sa Jerusalem, si Jesus ug ang iyang mga tinun-an sagad magpalabayg gabii sa Betania, nga karon mao ang lungsod sa el-ʽAzariyeh (El ʽEizariya), usa ka Arabikong ngalan nga nagkahulogang “Ang Dapit ni Lazaro.” Seguradong nakaestar si Jesus sa balay ni Marta, Maria, ug Lazaro. (Mat 21:17; Mar 11:11; Luc 21:37; Ju 11:1) Dihang mibiyahe gikan sa ilang balay paingon sa Jerusalem, lagmit miagi si Jesus sa ruta nga parehas sa makita sa video. Niadtong Nisan 9, 33 C.E., si Jesus misakay sa nating asno patungas sa Bukid sa mga Olibo paingog Jerusalem, lagmit gikan si Jesus sa Betfage, nga nagsubay sa dalan paingon sa Jerusalem.

Dalan gikan sa Betania paingon sa Betfage
Betfage
Bukid sa mga Olibo
Walog sa Kidron
Templo

Lansang Diha sa Bukog sa Tikod

Kini maoy picture sa replika sa lansang nga may gitas-ong 4.5 ka pulgada nga milapos sa tikod sa tawo. Ang orihinal nga bukog nakaplagan niadtong 1968, panahon sa pagpangubkob sa amihanang Jerusalem. Ang bukog panahon pa sa mga Romano. Kini naghatag ug arkeolohikal nga pamatuod nga ang mga lansang gigamit kaniadto aron ipaod ang tawo sa kahoyng estaka. Kini nga lansang lagmit parehas sa mga lansang nga gigamit sa Romanong kasundalohan aron ipaod si Jesu-Kristo sa estaka. Ang bukog nakit-an sa bato nga sudlanan, nga gitawag ug ossuary, diin ang naugang mga bukog sa patayng tawo isulod human kini madugta. Gipakita niini nga ang tawong gilansang sa estaka posibleng gihatagan ug desenteng lubong.—Mat 27:35.